Ինտերֆաքսի հաղորդմամբ՝ Նիդերլանդների, Չերնոգորիայի, Ճապոնիայի և Հարավային Կորեայի կառավարություններն իրենց քաղաքացիներին հորդորում են չմեկնել Ուկրաինա, իսկ այդ երկրում արդեն գտնվողներին կոչ են անում անհապաղ լքել Ուկրաինայի տարածքը:
Կիևում Նիդերլանդների դեսպան Յենես դե Մոլը նախազգուշացրել է, որ «կենտրոնացված տարհանում չի նախատեսվում» և խորհուրդ է տվել հնարավորինս արագ հեռանալ Ուկրաինայից:
Նմանօրինակ ուղերձով է հանդես եկել նաև Չերնոգորիայի արտաքին գերատեսչությունը:
Հարավային Կորեան վտանգավորության «կարմիր աստիճան» է սահմանել Ուկրաինայի պարագայում և արգելել է ուղևորություններն այդ երկիր:
Նույն վճիռն է կայացրել Ճապոնիայի կառավարությունը, որը հայտարարել է, թե «Ռուսաստանի ռազմական հզորության ավելացման հետևանքով Ուկրաինայում անկանխատեսելի իրավիճակ է ստեղծվել»:
