ՀՀ վարչապետի պաշտոնակատար, «Քաղաքացիական պայմանագիր» կուսակցության նախընտրական ցուցակը գլխավորող Նիկոլ Փաշինյանը «Քաղաքացիական պայմանագիր» կուսակցության՝ Նորք-Մարաշի նախընտրական շտաբում է:
Կուսակցության համակիրների հետ զրույցում Փաշինյանը նշեց, որ ոչ մի տրամաբանության մեջ չէր մտնում, որ պատերազմից հետո Կառավարությունը կկարողանա պահպանել իր դիրքերը, խորհրդարանական մեծամասնությունը կկարողանա պահպանել իր դիրքերը: Քաղաքագիտական վերլուծություններ են արվում, թե ինչպես դա տեղի ունեցավ:
«Դրա բացատրությունը գուցե այնքան էլ քաղաքագիտական չէ: Իմ համոզմունքն այն է, որ դրա համար վճռական գործոն է դարձել այն էմոցիոնալ և հոգևոր կապը, որ գոյություն ունի քաղաքացիների և Կառավարության միջև»,- ասաց Նիկոլ Փաշինյանը:
Փաշինյանն անդրադարձավ ամենահրատապ խնդիրներին՝ նշելով, որ առաջնայինը հայ-ադրբեջանական սահմանին տիրող վիճակն է:
«Իմ գնահատմամբ՝ մենք շատ արագ դեէսկալացիայի հնարավորություն ունենք: Վերջին օրերին մեր մի շարք գործընկերներ հանդես են եկել հայտարարություններով: Եվ ես ուզում եմ մեր բոլոր միջազգային գործընկերներին շնորհակալություն հայտնել իրավիճակին այդպիսի ուշադրությամբ հետևելու համար, շնորհակալություն հայտնել ՌԴ մեր գործընկերներին, Ֆրանսիային, Միացյալ Նահանգներին, Հնդկաստանին, Եվրախորհրդարանին, Կանադային, մյուս երկրներին, որոնք արձագանքել են:
Բայց ուզում եմ մեր բոլորի ուշադրությունը հրավիրել ԵԱՀԿ Մինսկի խմբի համանախագահների՝ երեկ տարածած հայտարարությանը: Ողջունում եմ այդ հայտարարությունը, և այնտեղ ներկայացված քայլերի տրամաբանությունը սկզբունքորեն, ըստ էության, ընդունելի է մեզ համար: ԵԱՀԿ Մինսկի խմբի համանախագահները կոչ են արել, որ անհետաձգելի քայլեր ձեռնարկվեն սահմանային լարվածությունը նվազեցնելու համար: Առաջարկվել է, որ կողմերը իրենց զորքերը հետ քաշեն: Եվ այս համատեքստում է արված հայտարարությունը անհետաձգելի քայլերի մասին:
Եվ շարունակությունը կարևոր է՝ ԵԱՀԿ Մինսկի խմբի համանախագահության աջակցությամբ իրականացնել սահմանային կետերի ճշգրտման աշխատանք՝ դեմարկացիա, դելիմիտացիա: Ուզում եմ հավաստել, որ Հայաստանի կառավարությունը հաստատակամ է գնալ այդ ճանապարհով և մենք պատրաստ ենք ցանկացած պահի սկսել զորքերի հետքաշման գործընթացը: Սպասում ենք, որ ԵԱՀԿ Մինսկի խմբի համանախագահները համապատասխան պայմանավորվածություն ձեռք բերեն Ադրբեջանի հետ, որպեսզի միաժամանակ սկսենք զորքերի հետքաշումը: Խոսքը, մասնավորապես, Սոթք-Խոզնավար հատվածի մասին է: Մենք պատրաստ ենք ԵԱՀԿ Մինսկի խմբի համանախագահության հովանու ներքո սկսել հենց այդ հատվածից սահմանային կետերի ճշգրտման աշխատանքները և իհարկե պատրաստ ենք համանախագահության շրջանակներում լիարժեք վերականգնել բանակցային գործընթացը՝ Ղարաբաղի հարցը կարգավորելու նպատակով»,- նշեց Փաշինյանը:
Վարչապետի պաշտոնակատարը հիշեցրեց, որ հայտարարության մեջ անդրադարձ կար նաև գերիների խնդրին, ասվում էր, որ պետք է գերիները վերադարձվեն: Փաշինյանն անդրադարձավ նաև ՊՆ հայտարարություններին՝ ողջամիտ ժամկետում զորքերը դուրս չբերելու դեպքում մեր սահմանի պահպանության համար համապատասխան օպերացիա իրականացնելու մասին:
«Քանի որ համանախագահող երկրներն առաջարկել են հրաժարվել ուժի կիրառման կամ դրա սպառնալիքից այս խնդրի լուծման համատեքստում, և քանի որ այդ մոտեցումը համահունչ է մեր պատկերացումներին, ուզում եմ ասել, որ ամբողջությամբ ընդունում ենք ԵԱՀԿ Մինսկի խմբի համանախագահության առաջարկները, որոնք ձևակերպված են երեկ տարածված հայտարարությամբ»,- հավելեց Փաշինյանը:
