Ես նման եմ առեղծվածի,
ես նա եմ, ով առանց հարցի գովեց մարդկանց հարսանիքում ու հարսանիք չարավ կյանքում,
ես նա եմ, նա, ով իր տան մեջ ապրեց անտուն, ով քնի մեջ մնաց արթուն, ով իր տվածն էլ ետ չառավ, ով սպանվեց, բայց չմեռավ։
Ես նա եմ, ով արդեն չկա,
ես նա եմ, ով դեռ պիտի գա….
Ես նման եմ առեղծվածի։
Համո Սահյանի այս խոսքերով Գրիշա Ստեփանյանը 67 տարեկանում հրաժեշտ տվեց կյանքին : Նա, ով արդեն չկա, կյանքում իր ուրվագծած լուսավոր արահետով դեռ երկար կհիշվի։ Մարդ, որն ապրեց մարդկանց համար, որի համար կյանքի իմաստը բարին արարելն էր, մարդ, որն իրեն ամբողջովին նվիրել էր ռադիոյին եւ հեռուստատեսությանը:
