Հասարակություն

Մեզ պետք է, որ այս պրոցեսի շուրջ լինի զրո նյարդ. Փաշինյանը՝ ԵՄ-ին անդամակցելու գործընթացի մեկնարկի օրենքի մասին

Աննա Կոստանյան 15.04.2026 - 13:21

գրված է Աննա Կոստանյան 15.04.2026 - 13:21 116
դիտում

Համապարփակ և ընդլայնված գործընկերության համաձայնագիրը մեզ համար աշխատանքային օրակարգ է, բայց պետք է նաև ընդունել, որ այդ աշխատանքային օրակարգն ընդունվել է, ընլայնվել է Հայաստանի և ԵՄ-ի միջև վերջին տարիներին հարաբերությունների աննախադեպ զարգացումով: Մենք վստահորեն շարունակելու ենք այս ճանապարհը: Այդ մասին ասաց վարչապետ Նիկոլ Փաշինյանը Հայաստան-ԵՄ քաղհասարակության պլատֆորմի 8-րդ երկկողմ հանդիպման ժամանակ:

Այս համատեքստում Նիկոլ Փաշինյանը հիշեցրեց, որ Հայաստանն ընդունել է Եվրամիությանն ՀՀ-ի անդամակցելու գործընթացի մեկնարկի մասին օրենք:

«Մեր ռազմավարությունն այն է, որ այս պրոցեսի մեջ մենք չենք պատրաստվում շանտաժի գործիքներ կիրառել այդ թվում՝ ԵՄ-ի նկատմամբ, որ մենք այս օրենքն ընդունել ենք, դե հիմա մյուս ամիս մեզ ընդունեք ԵՄ: Ո՛չ, ամենևի՛ն: Մեզ պետք է, որ այս պրոցեսի շուրջ լինի զրո նյարդ, և դա մեզ համար հնարավորություն է իրապես համապատասխանելու որպես երկիր, բարեփոխումների գործընթացը շարունակելու այնպես, որ իսկապես համապատասխանենք ԵՄ չափանիշներին: Երբ մենք օբյեկտիվորեն լինենք այս կետում, ԵՄ անդամ դառնալ-չդառնալն այս կետում քաղաքական որոշման հարց է:

ԵՄ-ն կարող է որոշել չընդլայնվել կամ որոշել ընդլայնվել որոշակի տրամաբանությամբ: Մենք որևէ մեկի քաղաքական կամքին չենք կարող բռնանալ: Եթե ԵՄ-ն որոշի ընդունել մեզ ԵՄ լիիրավ անդամ, շա՛տ լավ: Եթե կորոշի չընդունել, մենք էլի շահած դուրս կգանք, որովհետև կլինենք ժամանակակից լավագույն ստանդարտներին համապատասխանող երկիր:

Մեր խնդիրն է, մեր նպատակն է, մեր ռազմավարությունն է լավագույն ստանդարտներին համապատասխանող երկիր լինել, և մենք հասկանում ենք, որ այսօր հեռու ենք այդ կետից, բայց ունենք անհրաժեշտ քաղաքական կամք, ռազմավարություն, տեսլական, թե ինչպես շարժվել այդ ուղղությամբ, ինչպես հասնել այդ կետին:

ԵՄ-Հայաստան քաղհասարակության պլատֆորմի գործունեությունն այս իմաստով շատ կարևոր է»,- ասաց նա:

նախորդ գրառումը

Հայաստանի եզդիական համայնքը տոնում է ազգային Նոր տարին

հաջորդ գրառումը

ԵՄ-ն երկրորդ առաքելությունը կունենա Հայաստանում

ՆՄԱՆԱՏԻՊ ՀՈԴՎԱԾՆԵՐ