Նախորդ տարվա հոկտեմբեր և այս տարվա փետրվար ամիսներին Գյումրիի Մանուշյան և Թետչերի փողոցներում երկու գողություն էր կատարվել։ Մի դեպքում մտել էին ավտոտնակ ու գողացել կայանված «Մերսեդես» մակնիշի մեքենայի լուսարձակները, ռադիատորը, «ABS» բլոկը, ավտոտնակից հափշտակել էին նաև մետաղյա ձողեր: Երկրորդ դեպքը բնակարանային գողություն էր։ Օգտվելով տանտերերի բացակայությունից՝ տեխնիկական միջոցների գործադրմամբ կոտրել էին մուտքի դռան փականը և հափշտակել լվացքի մեքենա, շինարարական գործիքներ, սպասք և հագուստ:
Հարուցվեց քրեական գործ։
Ոստիկանության Մուշի բաժնի ծառայողները դեպքի վայրերի զննությունից հետո լայնածավալ հետախուզական միջոցառումներ ձեռնարկեցին։ Առաջ քաշվեցին աշխատանքային տարբեր վարկածներ։ Օպերատիվ հարցումների արդյունքում քրեական հետախույզները տեղեկություններ ստացան, որ նշված գողությունները կատարել է Գյումրի քաղաքի Անտառավան 4-րդ թաղամասի 20-ամյա մի բնակիչ։ Նրան տանը հայտնաբերել չհաջողվեց։
Մայիսի 24-ին կասկածվողը Երևան քաղաքի Սիլիկյան թաղամասում հայտնաբերվեց և բերման է ենթարկվեց ոստիկանության Մուշի բաժին։
Նա խոստովանել է ոչ միայն գողությունները կատարելու, այլև գողոնն իրացնելու փաստը։
20-ամյա երիտասարդը ներկայացվել է նախաքննական մարմնին։ Ձեռնարկվում են միջոցառումներ՝ գողոնը հայտնաբերելու ուղղությամբ: Նախաքննությունը շարունակվում է:
***
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
Մուշի ոստիկանները գողություններ են բացահայտել, այդ թվում՝ բնակարանային
նախորդ գրառումը