Ռուսաստանի Դաշնության նախագահ Վլադիմիր Պուտինը Կրեմլում ելույթ է ունեցել ՊՆ-ի, Ռոսգվարդիայի, ԱԴԾ-ի, ՆԳՆ-ի և ԱԴԾ-ի՝ հունիսի 24-ին ապստամբության փորձի ճնշմանը մասնակցած ստորաբաժանումների առջև։
Ինչպես գրում է ՌԻԱ «Նովոստի»-ն, Պուտինն իր խոսքում հայտարարել է, որ զինվորականները փաստացի կասեցրել են քաղաքացիական պատերազմը:
«Դուք պաշտպանեցիք սահմանադրական կարգը, մեր քաղաքացիների կյանքը, անվտանգությունն ու ազատությունը, փրկեցիք մեր հայրենիքը ցնցումներից, փաստացի կասեցրիք քաղաքացիական պատերազմը, դժվարին իրավիճակում գործեցիք հստակ, ներդաշնակ, գործով ապացուցեցիք ձեր հավատարմությունը ժողովրդին»,- ասել է ՌԴ նախագահը` դիմելով ուժայիններին։
Ժողովուրդն ու բանակը չբռնեցին ապստամբների կողմը, ապստամբությունը ճնշելու հարցում վճռական դեր խաղացին զինվորականների վճռականությունն ու քաջությունը, ինչպես նաև հասարակության համախմբումը, շարունակել է Պուտինը։
Հիշեցնենք, որ շաբաթ գիշերը Դոնի Ռոստովում «Վագներ» մասնավոր ռազմական ընկերության մարտիկները գրավել են Հարավային ռազմական օկրուգի շտաբը։ Դա տեղի է ունեցել Եվգենի Պրիգոժինի հայտարարությունների ֆոնին, թե իբր ՌԴ ԶՈւ-ի կողմից «Վագներ»-ի ճամբարների վրա հրթիռային հարվածներ են եղել:
Պրիգոժինի դեմ քրեական գործ է հարուցվել զինված ապստամբություն կազմակերպելու համար։ ՌԴ նախագահ Վլադիմիր Պուտինը ապստամբների գործողություններն անվանել է «հանցավոր արկածախնդրություն», «դանակով հարված Ռուսաստանի թիկունքին» և «դավաճանություն»։ Ավելի ուշ Բելառուսի նախագահ Ալեքսանդր Լուկաշենկոն Պուտինի հետ համաձայնեցված բանակցություններ է վարել Պրիգոժինի հետ, որից հետո Լուկաշենկոյի մամուլի ծառայությունը հայտնել է, որ ընկերության ղեկավարն ընդունել է Լուկաշենկոյի առաջարկը՝ դադարեցնել «Վագներ»-ի շարժումը Ռուսաստանում և հետագա քայլեր ձեռնարկել դեէսկալացիայի համար։ ՌԴ նախագահի մամուլի քարտուղար Դմիտրի Պեսկովը հայտնել է, որ Պրիգոժինը կմեկնի Բելառուս, իսկ քրեական գործը կկարճվի։ Կրեմլում ասել են, որ դրա երաշխիքը Ռուսաստանի նախագահի խոսքն է։
