Բրազիլիայում Գերագույն դատարանը ամերիկացի գործարար, միլիարդատեր Իլոն Մասկի նկատմամբ հետաքննություն է սկսել՝ կապված գործարարին պատկանող X սոցիալական հարթակի հետ, հայտնում են արևմտյան լրատվական գործակալությունները՝ վկայակոչելով դատական փաստաթղթերը:
Դատավոր Ալեքսանդր դե Մորաեսը որոշում է կայացրել, որով X-ի հարթակին պարտավորեցնում է արգելափակել մի շարք հաշիվներ՝ վկայակոչելով այն փաստը, որ նրանք «ապատեղեկատվություն են տարածում»։
«Սոցիալական ցանցերը իրավական նորմերից զերծ գոտի չեն»,- իր որոշման մեջ գրել է Մորաեսը՝ ընդգծելով, որ «մենք չենք կարող մեզ թույլ տալ, որ արտերկրում ապրող միլիարդատերերը վերահսկեն սոցցանցերը, ոտնահարեն իրավական համակարգը՝ անտեսելով դատարանի որոշումներն ու սպառնալով մեր գերատեսչություններին»:
Ապրիլի 6-ին Իլոն Մասկը սկսել է մի շարք հարձակումներ Մորաեսի դեմ՝ մեղադրելով նրան «ագրեսիվ գրաքննության» համար, որը խախտում է օրենքը և Բրազիլիայի ժողովրդի կամքը։
Մասկը բողոքարկել է դատավորի որոշումը՝ նշելով, որ այն հակասահմանադրական է:
Դատական որոշման հետագա անտեսման դեպքում X հարթակին սպառնում է օրական 18 հազար եվրոյի չափով տուգանք։
