Ապրիլի 18-ին Խորվաթիայի մայրաքաղաք Զագրեբում ԵԱ-ում պայքարի մեջ են մտել 61 կգ քաշային Արսեն Հարությունյանը, 74 կգ քաշային Հրայր Ալիխանյանը և 86 կգ քաշային Մուշեղ Մկրտչյանը:
Արսեն Հարությունյանը (61 կգ) ոչ մի շանս չտվեց մրցակցին և դուրս եկավ եզրափակիչ:
Հրայր Ալիխանյանը (74 կգ) 1/4-ում 0:3 հաշվով պարտվել է Սլովակիայի ներկայացուցչին: Հրայր Ալիխանյանին հաղթած սլովակ ըմբիշը հասել է եզրափակիչ: Մեր ըմբիշը պայքարը կշարունակի բրոնզե մեդալի համար:
Ավելի վաղ տեղեկացրել էինք՝ Արսեն Հարությունյանը (61 կգ ) 7:0 հաշվով հաղթել է թուրք մրցակցին և դուրս եկել կիսաեզրափակիչ, նա պայքարը սկսել էր 1/4-ից:
Հիշեցնենք՝ ազատոճային ըմբիշ, 65 կգ քաշային Վազգեն Թևանյանը Զագրեբում ընթացող Եվրոպայի առաջնության կիսաեզրափակչում 12:4 հաշվով առավելության է հասել Ուկրաինան ներկայացող հայազգի ըմբիշ Էրիկ Առուշանյանի նկատմամբ և դուրս է եկել եզրափակիչ: Թևանյանը պայքարը սկսել է 1/8 եզրափակչից, որում 10:0 հաշվով հաղթել է Իսրայելի ներկայացուցիչ Ջոշուա Ստյուարտ Ֆինեսիլվեին: Քառորդ եզրափակչում արդեն Թևանյանը 4:1 հաշվով առավելության է հասել ադրբեջանցի ըմբիշի նկատմամբ:
Եզրափակչի ուղեգիր նվաճելուն մոտ էր նաև Հայաստանի մյուս ներկայացուցիչ, 79 կգ քաշային Արման Ավագյանը: ԵԱ-ի 1/2 եզրափակչում Ավագյանը գոտեմարտել է Հունաստանի ներկայացուցչի հետ և 10-12 հաշվով ցավալի պարտություն կրել: Հայ ըմբիշը պայքարը սկսել է 1/8 եզրափակչից, որտեղ 5:1 հաշվով հաղթանակի է հասել բուլղարացի Միխայիլ Գեորգևի նկատմամբ, քառորդ եզրափակչում արդեն Ավագյանը 5:1 հաշվով առավելության է հասել Ռումինիան ներկայացնող Մաքսիմ Վասիլիոգլոյի նկատմամբ: Այսպիսով, Ավագյանը կպայքարի ԵԱ-ի բրոնզե մեդալի համար:
Մրցումային առաջին օրը մրցագորգ դուրս եկած Հայաստանի մյուս ներկայացուցիչներից Մանվել Խնձրցյանը որակավորման փուլում 5:8 հաշվով զիջել է Բուլղարիան ներկայացնող Գեորգի Վանգելովին, 70 կգ քաշային Արման Անդրեասյանը պայքարը սկսել է քառորդ եզրափակչից, որում 1:2 հաշվով պարտվել է մոլդովացի ըմբիշին, իսկ 97 կգ քաշային Սերգեյ Սարգսյանը 1/8 եզրափակչում 0:8 հաշվով զիջել է գերմանացի Էրիկ Սվեն Թայլեին:
