ՀՀ վարչապետի տիկին Աննա Հակոբյանը «Կրթվելը նորաձև է» շարժման շրջանակում նոր տեսաուղերձով բարձրաձայնում է ընտանեկան բռնության խնդրի և հասարակությունում բռնության նկատմամբ անհանդուրժողական վերաբերմունք ձևավորելու անհրաժեշտության մասին։
Հրապարակված կարճ տեսանյութը թեմայի շուրջ նախատեսվող ավելի լայն հաղորդակցական նախաձեռնության դեռ միայն առաջին հոլովակն է։ Առաջիկայում նույն թեմայով կհրապարակվի նաև տեսանյութերի շարք:
Տեսաշարի նպատակն է ոչ միայն խնդրի մասին խոսելը, այլև դրա շուրջ ավելի լայն հանրային և մասնագիտական քննարկում ձևավորելը՝ նպաստելով բռնության նկատմամբ զրոյական հանդուրժողականության մշակույթի ձևավորմանը և ընտանեկան բռնության քրեականացմանը։
Նախաձեռնության հիմնական ուղերձն է՝ բռնությունը չի կարող լինել սիրո, ընտանիքի կամ ուժի դրսևորում, և այն չպետք է ընդունվի կամ արդարացվի որևէ հանգամանքով։
Իսկ երկարաժամկետ նպատակը ընտանեկան բռնությունը առանձին հանցակազմով քրեականացնելու հարցը հանրային և մասնագիտական օրակարգ բերելն է:
Սա միայն սկիզբն է։ Թեմայի շուրջ ավելին՝ շուտով։