Վայոց ձորի 2 համայնքում այսօր ՏԻՄ ընտրություն էր։
Ինչպես հայտնում է «Լուրերի» թղթակիցը, ժամը 20.00-ին, ինչպես կարգն է, փակվել են 21 ընտրատեղամասերը՝ 9-ը՝ Արենի խոշորացված համայնքում, 12-ը՝ Եղեգիս խոշորացված համայնքում։ Այս պահին բոլոր ընտրատեղամասերում ձայների հաշվարկն է մեկնարկել։
Թիվ 36 ընտրատարածքային ընտրական հանձնաժողովի նախագահ Աղվան Հարությունյանի փոխանցած տվյալների համաձայն՝ ժամը 20.00-ի դրությամբ Վայոց ձորի Եղեգիս խոշորացված համայնքում, որը ներառում է 12 գյուղ, քվեարկության իրավունք ունեցող 4 632 քաղաքացուց ընտրությանը մասնակցել է 2 814-ը կամ 60.75 տոկոսը։
Արենի խոշորացված համայնքում, որը ներառում է 9 գյուղ, և քվեարկության իրավունք ունի 8 196 քաղաքացի, ընտրությանը մասնակցել է 3 688 քաղաքացի կամ ընտրելու իրավունք ունեցողների 45 տոկոսը։
Առավել մեծ մասնակցություն բացարձակ թվով եղել է Արենի բնակավայրում՝ 668, իսկ տոկոսային հարաբերակցությամբ՝ Գնիշիկում՝ 59.68 տոկոս։
Եղեգիս համայնքի դեպքում տոկոսային հարաբերակցությամբ առավելագույն մասնակցությունը գրանցվել է Հորս բնակավայրում՝ 74.58 տոկոս, իսկ բացարձակ թվով՝ Շատին բնակավայրում՝ 676։