Էներգետիկ ճգնաժամի և ավտոմեքենա գնորդների համար շահավետ պետական սուբսիդավորման ծրագրի պայմաններում Գերմանիայում էլեկտրամոբիլների պահանջարկը մեկ տարվա ընթացքում աճել է 80%-ով։ Ընդ որում՝ վաճառքների ամենամեծ աճը գրանցվում է չինական արտադրողների մոտ։
Գերմանիայում էլեկտրամոբիլների պահանջարկը շարունակում է բարձր մնալ և աճել։ Գերմանիայի ավտոտրանսպորտային դաշնային վարչության (Kraftfahrt-Bundesamt, KBA) տվյալներով՝ 2026 թվականի հոկտեմբերին գրանցված շուրջ 254 500 նոր մարդատար ավտոմեքենաներից մոտ 94 հազարը եղել են ամբողջությամբ էլեկտրական։ Այս ցուցանիշը շուրջ 80%-ով գերազանցում է 2025 թվականի նույն ժամանակահատվածի տվյալը։
Էլեկտրամոբիլների պահանջարկի աճի պատճառները․ պետական սուբսիդիաներ և էներգետիկ ճգնաժամ
Ի տարբերություն էլեկտրամոբիլների՝ ներքին այրման շարժիչով մեքենաների, այդ թվում՝ հիբրիդային ավտոմեքենաների, պահանջարկը 2026 թվականի հոկտեմբերին կտրուկ նվազել է նախորդ տարվա նույն ամսվա համեմատ։ KBA-ի տվյալներով՝ այդ դասի մեքենաներին բաժին է ընկել շուրջ 62 400 նոր գրանցում։
Reuters գործակալությունը միտման հիմնական պատճառներ է համարում վառելիքի բարձր գները և էլեկտրամոբիլների գնման պետական սուբսիդավորման ծրագիրը, որը մեկնարկել է 2026 թվականի մայիսին։
Գերմանական ավտոարտադրողները կրկին կորցնում են դիրքերը
Չնայած Գերմանիայում էլեկտրամոբիլների ժողովրդականության արագ աճին՝ այս միտումից առավել մեծ օգուտ են ստանում արտասահմանյան ավտոարտադրողները, նշում է dpa գործակալությունը։
Խորհրդատվական EY ընկերության տվյալներով՝ շուկայի ամենամեծ աճը գրանցվել է չինական արտադրողների մոտ․ նրանց մասնաբաժինը էլեկտրամոբիլների շուկայում աճել է 5,2%-ից մինչև 8,4%։
Միևնույն ժամանակ, գերմանական ավտոարտադրողները ամիս առ ամիս կորցնում են իրենց մասնաբաժինը էլեկտրամոբիլների շուկայում։