Այսօր խորհրդարանում լրագրողները հետաքրքրվեցին «Քաղաքացիական պայմանագիր» խմբակցության քարտուղար Վոլոդյա Հակոբյանից ընդդիմության նախաձեռնության՝ բանակում մահացությունների ու Շաքիի դեպքերի վերաբերյալ հանձնաժողով ձևավորելու մասին, հարցրեցին՝ արդյո՞ք հարցը քննարկվել է խմբակցության նիստին:
Ի պատասխան՝ Հակոբյանը հայտնեց՝ քննարկում չեն ունեցել:
«Պատգամավորների լիազորությունների տիրույթում է քննիչ հանձնաժողով ստեղծելը: Ստեղծելու մասին ընթացակարգեր կան, թող անեն»,- ասաց նա:
Լրագրողների դիտարկմանը, թե ստեղծելու համար անհրաժեշտ են իշխող խմբակցության քվեները, ասաց՝ չի կարծում, թե կմիանան այդ նախաձեռնությանը:
«Բայց քննարկում չենք ունեցել»,- հայտարարեց Հակոբյանը:
Ճշտող հարցին՝ արդյոք չմիանալը չի նշանակում բանակում տեղի ունեցող մահերի կոծկման փաստ, ասաց՝ այդ հանգամանքը բացահայտվում է իրավասու մարմինների կողմից:
«Դրանց համար կան պետական մարմիններ: Քննիչ հանձնաժողովը չպետք է բացահայտի, օրինակ՝ ինքնասպանությունները ինչի հետևանք են կամ դրանք ինքնասպանություններ են, թե սպանություններ: Քրեական գործեր կան հարուցված»,- ասաց նա:
Ըստ Հակոբյանի՝ չի կարծում, թե քննիչ հանձնաժողովի ստեղծումը կարող է արդյունավետ լինել:
«Բանակի հետ կապված խնդիրների դեպքում կան իրավասու մարմիններ, իրականացվում են բարեփոխումներ, իսկ եկեղեցում այն մարմինները, որոնք դրանք իրավասու են ներկայացնել, չեն ցանկանում իրականացնել, որովհետև իրենց ձեռնտու չի դա»,- պարզաբանեց «Քաղաքացիական պայմանագիր» խմբակցության քարտուղարը՝ ի պատասխան լրագրողների հարցերի:
Նրա խոսքով՝ բանակի բարեփոխումների գործընթացը շարունակական է, բանակում սպառազինությունների համալրում է տեղի ունենում, ամրաշինական կառույցներ են ավելանում:
«Շփման գիծը երկարել է, մենք չենք ասում՝ բանակում խնդիրներ չկան, հակառակը, ասում ենք՝ խնդիրներ կան, ու դրանք պետք է լուծում ստանան»,- ընդգծեց Հակոբյանը: