Շիրակի մարզպետ Նազելի Բաղդասարյանը մարզպետարանի ոլորտային պատասխանատուների հետ այսօր եղել է Արթիկում, համայնքի ղեկավար Անան Ոսկանյանի, «Արթիկի բժշկական կենտրոնի» տնօրենի ուղեկցությամբ Նազելի Բաղդասարյանը շրջել է բժշկական կենտրոնում, հետևել և ծանոթացել աշխատանքներին։
Մարզպետին զեկուցվել է, որ հաստատությունն ունի 25 մահճակալ հզորություն, որից 15-ը վիրաբուժական է, 10-ը՝ սոմատիկ, 7 նեղ մասնագիտական և 4 դիսպանսեր կաբինետ։ Հիվանդանոցն այս պահին աշխատում է 85 տոկոս ծանրաբեռնվածությամբ։
Մարզպետը հետաքրքրվել է հիվանդանոցի վճարովի ծառայությունների մատուցման ցուցանիշներով, որի վերաբերյալ տնօրենը տեղեկացրել է, որ մինչ օրս մատուցվել է շուրջ 55 մլն դրամի ծառայություն, ինչը նախորդ տարվա նույն ժամանակահատվածի համեմատ ավել է 11 մլն դրամով։
«Մեզ համար կարևոր նախապայմանը բնակչության բուժսպասարկման որակն է, հատկապես մարզկենտրոնից դուրս նրանց լիարժեք սպասարկումը, ամեն ինչ պետք է անենք առաջնային բուժսպասարկման որակն ապահովելու, մեր քաղաքացիների հոգսերը թեթևացնելու համար»,- շրջայցի ժամանակ նշել է մարզպետը։
Մարզպետը եղել է նաև «Արթիկի մոր և մանկան առողջության պահպանման կենտրոնում», որտեղ իրականացվում է Արթիկի տարածաշրջանի ծննդատնային և մանկական հիվանդությունների հիվանդանոցային բուժօգնությունը և կանանց կոնսուլտացիան, շրջել է կենտրոնում, ծանոթացել աշխատանքներին։
Հանդիպումների ժամանակ մարզպետն անդրադարձել է կառավարության՝ առողջապահության բնագավառի զարգացմանը միտված ծրագրերին և կարևոր ձեռնարկներից համարել այն հանգամանքը, որ կառավարության 2021-2026 թվականների գործունեության միջոցառումների ծրագրով Արթիկի բժշկական կենտրոնն ընդգրկվել է ժամանակակից չափանիշներին համապատասխան գործող բժշկական հաստատությունների շենքերի կառուցում, վերակառուցում ծրագրում։ Համայնքի ավագանին արդեն 1.5 հա մակերեսով տարածքի տրամադրման հարցում որոշում կայացրել է, ինչպես նաև պատրաստակամություն է հայտնել իրականացնել նոր կառուցվելիք բժշկական կենտրոնի տարածքի երկկողմանի մոտեցման ճանապարհների հիմնանորոգման, լուսավորության ցանցի անցկացման և համապատասխան ենթակառուցվածքների կառուցման հարցում։ Մարզային իշխանության ներկայացուցիչները եղել են բժշկական կենտրոնի կառուցման համար նախատեսված տարածքում։
Նշենք, որ կառավարության որոշմամբ գումար է հատկացվել բժշկական կենտրոնի նոր մասնաշենքի նախագծանախահաշվային փաստաթղթերի մշակման աշխատանքների իրականացղման համար, դրանք այժմ ընթացքի մեջ են։
Նազելի Բաղդասարյանը ծանոթացել «Արթիկի բժշկական կենտրոնի» աշխատանքներին
