Վիլնյուսում Ռուսաստանի դեսպանը ստիպված կլինի լքել Լիտվան. Մոսկվայից հետ է կանչվել Լիտվայի դեսպանը։ Այդ մասին երկուշաբթի լրագրողներին հայտնել է Բալթյան այս հանրապետության արտաքին գործերի նախարար Գաբրիելիուս Լանդսբերգիսը՝ տեղեկացնում է svoboda.org-ը։
«Լիտվայի կառավարությունը, արձագանքելով Ուկրաինայում Ռուսաստանի շարունակվող ագրեսիվ գործողություններին, որոշել է իջեցնել դիվանագիտական առաքելության կարգավիճակը։ ՌԴ դեսպանը ստիպված կլինի լքել Լիտվան: Մոսկվայում Լիտվայի դեսպանն էլ շուտով կվերադառնա Վիլնյուս»,- ասել է ԱԳՆ ղեկավարը։
Լիտվայի կառավարության որոշմամբ կփակվի նաև Կլայպեդայում Ռուսաստանի գլխավոր հյուպատոսությունը։ Ինչպես նշել է Լանդսբերգիսը, Վիլնյուսն իր որոշման մասին տեղեկացրել է Եվրամիության և ՆԱՏՕ-ի գործընկերներին։ «Մենք մեր գործընկերներին հորդորել ենք հետևել մեր օրինակին»,- ասել է դիվանագետը։
Մեկ այլ որոշմամբ՝ մոտ ժամանակում Կիև կվերադառնա Ուկրաինայում Լիտվայի դեսպանը:
Վիլնյուսի որոշման հրապարակումից անմիջապես հետո Ռուսաստանի հետ դիվանագիտական հարաբերությունների մակարդակի իջեցման մասին է հայտարարել նաև Լատվիայի կառավարությունը: Ռիգան նույնպես պատրաստվում է վտարել Ռուսաստանի դեսպանին և հետ կանչել իր դեսպանին Մոսկվայից։
ՌԴ ԱԳՆ պաշտոնական ներկայացուցիչ Մարիա Զախարովան հայտարարել է, որ Կրեմլի պատասխան միջոցները չեն ուշանա:
Միաժամանակ Նիդերլանդների դեսպանատունը Մոսկվայում և Թագավորության գլխավոր հյուպատոսությունը Սանկտ Պետերբուրգում հայտարարել են, որ չեն դադարեցնում աշխատանքը Ռուսաստանում:
Նրանք ապատեղեկատվություն են համարել անցյալ շաբաթ որոշ լրատվամիջոցների տարածած լուրերը, որոնց համաձայն՝ Հոլանդիայի դիվանագիտական ներկայացուցչությունները որոշել են դադարեցնել աշխատանքը Ռուսաստանում՝ մինչև Ուկրաինայում հատուկ գործողության ավարտը։
