ՀՀ պաշտպանության նախարարի պաշտոնակատար Վաղարշակ Հարությունյանը «Լուսավոր Հայաստան» խմբակցության պատգամավոր Սրբուհի Գրիգորյանի հարցին ի պատասխան անդրադարձավ օրերս Սյունիքի մարզի Արավուզ համայնքում տեղի ունեցած միջադեպին, երբ ադրբեջանական զինվորներ բռնության են ենթարկել մեր քաղաքացուն:
«Միջադեպը, որ ասում եք, տեղի է ունեցել այն պատճառով, որ մեր հովիվը մոտեցել է դիրքերին, և այնտեղ քաշքշուկ է եղել: Միջադեպը հարթվել է: Ուզում եմ հստակ ասել, որ բոլոր այն սահմանը, որ նախատեսված է Խորհրդային Միության և միջազգայնորեն ճանաչված անկախ Հայաստանի՝ ամբողջովին պահպանվում է: Կան տեղեր, որ մերոնք 50 մ առաջ են, կան տեղեր, որ հակառակն է: Սա պայմանավորված է այն հանգամանքով, որ դիրքը հնարավոր չի դնել այնպիսի տեղ, որն ապահովի անվտանգությունը և վերահսկողությունը: Փոփոխությունները, որ տեղի են ունեցել սահմանին, իր մակերեսով շատ փոքր են, և այստեղ այդ հարցերը պետք է լուծվեն սահմանազատման ժամանակ»,- ասաց Վաղարշակ Հարությունյանը:
Նա նշեց՝ չկան միջադեպեր, որ բերում են զոհերի կամ վիրավորների. այս խնդիրը լուծված է, և իրենք ամեն ինչ անելու են, որ նման դեպքերը բացառվեն, որ, օրինակ՝ հովիվը չգնա այդտեղ, կամ մարդիկ չմոտենան ադրբեջանական դիրքերին: