Սեպտեմբերի 15-20-ը Սիրիայում կանցկացվի Ժողովրդական խորհրդի վաղաժամկետ ընտրություն։ Այդ մասին հուլիսի 27-ին հայտնել է Սիրիայի պետական ՍԱՆԱ լրատվական գործակալությունը՝ հղում անելով հունիսին ձևավորված երկրի ընտրական հանձնաժողովի նախագահ Մոհամմադ Թահ ալ Ահմադին:
Մեկ օր առաջ ալ-Ահմադը ներկայացրել էր Սիրիայի անցումային շրջանի նախագահ Ահմեդ աշ-Շարաայի՝ ընտրություն անցկացնելու ծրագրերը։ Երկրի ընտրական հանձնաժողովի ղեկավարի խոսքով՝ աշ-Շարաայի կողմից համապատասխան հրամանագիրը ստորագրելուց հետո երեք շաբաթվա ընթացքում Սիրիայում կձևավորվեն ընտրական մարմիններ, որից հետո թեկնածուները կկարողանան համապատասխան հայտեր ներկայացնել և բանավեճեր անցկացնել:
Ծրագրի համաձայն՝ Հանրապետության Ժողովրդական խորհուրդը կներառի 210 խորհրդարանականի։ Ընդ որում՝ նրանց միայն երկու երրորդն է ընտրվելու քաղաքացիների քվեարկության արդյունքում, մնացած 70-ին նշանակելու է երկրի նախագահը: Անցումային շրջանում խորհրդարանը պատասխանատու կլինի Սիրիայի նոր օրենսդրության ձևավորման համար և կաջակցի երկրի մշտական Սահմանադրության ստեղծմանը:
Թուրքական TRT մեդիաընկերությունը նշում է, որ դեռևս 2024 թվականի դեկտեմբերին աշ-Շարաան ընդունել էր, որ Սիրիայում խորհրդարանական ընտրությունները հնարավոր կլինի անցկացնել միայն մի քանի տարի անց։ Բաշար Ասադին տապալած իսլամիստների առաջնորդը որոշումը բացատրել է մինչ այդ երկրում մարդահամար անցկացնելու և նոր Սահմանադրություն պատրաստելու անհրաժեշտությամբ:
Հեռուստաալիքը ենթադրում է, որ Սիրիայի իշխանությունների դիրքորոշման փոփոխությունը կարող է կապված լինել ԱՄՆ-ի և ԵՄ-ի կողմից Դամասկոսի նկատմամբ պատժամիջոցների ճնշման թուլացման հետ: ԵՄ-ն Սիրիայի դեմ որոշ պատժամիջոցներ չեղարկեց 2025 թվականի փետրվարին և մայիսին, իսկ Վաշինգտոնն իր գործընկերների օրինակին հետևեց հունիսի վերջին։ Հուլիսի սկզբին էլ Միացյալ Նահանգները աշ-Շարաայի գլխավորած իսլամիստական «Հայաթ Թահրիր ալ-Շամ» խմբավորումը հանեց ահաբեկչական կազմակերպությունների ցուցակից։