Անցումային շրջանում Սիրիայի նախագահ Ահմեդ աշ-Շարաան հանդիպել է ՄԱԿ-ի գլխավոր քարտուղար Անտոնիու Գուտերեշի հետ, որը Դամասկոս է ժամանել «համերաշխության այցով»՝ հայտնում է SANA լրատվական գործակալությունը:
Բանակցությունների ավարտին հայտարարություններ չեն արվել, սակայն Գուտերեշը X-ում գրել է, որ Դամասկոս իր այցի «նպատակն է համերաշխություն հայտնել Սիրիայի ժողովրդին»:
«ՄԱԿ-ն աջակցում է Սիրիային նրա պատմության շրջադարձային փուլում։ Կոչ եմ անում միջազգային հանրությանը անել ամեն ինչ՝ օգնելու սիրիացիներին նրանց համար այս ճակատագրական պահին»,- նշել է Գուտերեշը։
Ենթադրվում է, որ այցը ելակետ կհանդիսանա Սիրիայում կրթության, առողջապահության, էներգետիկայի, ջրամատակարարման, գյուղատնտեսության, շրջակա միջավայրի պահպանության և թվային փոխակերպման ոլորտներում ՄԱԿ-ի ծրագրերի իրականացման համար, ինչը կնպաստի երկրի հետպատերազմյան վերականգնման գործընթացին ու կայուն զարգացմանը:
Ծրագիրը ներառում է նաև այցելություն Կունեյտրա՝ ՄԱԿ-ի անջատման վերահսկման ուժերի շտաբ, որը ստեղծվել է 1974 թվականին՝ Իսրայելի և Սիրիայի միջև հրադադարի ռեժիմը վերահսկելու համար:
Գուտերեշը 2009 թվականից ի վեր միջազգային հանրության առաջին վարչական ղեկավարն է, որն այցելել է Դամասկոս: ՄԱԿ-ի վերջին գլխավոր քարտուղարը, որը եղել է Սիրիայում, Պան Գի Մունն էր։