Ռուսաստանը և Ուկրաինան գերիների ևս մեկ փոխանակում են իրականացրել՝ յուրաքանչյուր կողմից 160 մարդ, հայտարարել է Ռուսաստանի պաշտպանության նախարարությունը ուրբաթ՝ հունիսի 26-ին։ Ուկրաինայի նախագահ Վոլոդիմիր Զելենսկին հաստատել է փոխանակումը։
«Բանակցային գործընթացի արդյունքում այսօր ազատ է արձակվել 2022 թվականից ի վեր գերության մեջ գտնվող 160 ուկրաինացի զինծառայող: Նրանց թվում են Ուկրաինայի զինված ուժերի, պետական հատուկ տրանսպորտային ծառայության, ազգային գվարդիայի զինծառայողներ և սահմանապահներ։ Նրանք պաշտպանել են Ուկրաինան Մարիուպոլում և Ազովստալում, ինչպես նաև Դոնեցկի, Լուգանսկի, Խարկովի, Զապորոժիեի, Կիևի, Չեռնիգովի և Սումիի ուղղություններում»,- գրել է Զելենսկին սոցկայքերում։
Ռուսաստանի պաշտպանության նախարարության տվյալներով՝ փոխանակումը տեղի է ունեցել ԱՄԷ-ի միջնորդությամբ։ Ուկրաինական գերությունից վերադարձած ռուս զինծառայողները գտնվում են Բելառուսում, որտեղ նրանց հետ աշխատում է Ռուսաստանի մարդու իրավունքների հանձնակատար Յանա Լանտրատովան։
Ըստ «Ես ուզում եմ գտնել» նախագծի ներկայացուցիչ Ալեքսանդր Սեմենցովի՝ փոխանակված ռուսների մեծ մասը (93%) պայմանագրային զինծառայողներ են։ Ռուսաստան վերադարձած ռազմագերիների 77%-ը 40-44 տարեկան է, 64%-ը դատվածություն է ունեցել կամ հետախուզման մեջ է եղել, 82%-ը (131 մարդ) գերության մեջ անցկացրել է մոտ մեկ տարի։
«Մեր ելքը» հասարակական շարժման առաջնորդ Իրինա Կրինինան էլ հայտարարել է, որ հազարավոր մարդիկ դեռևս ուկրաինական գերության մեջ են՝ փոխանակմանը սպասելով ավելի քան երկու տարի։