IHA լրատվական գործակալության փոխանցմամբ` Թուրքիայի բնակավայրերում հայտնաբերվել է երկու անհայտ անօդաչու թռչող սարք: 200 կգ-ից ավելի կշռող սարքից մեկն անկումից հետո հրդեհվել է: Իրավապահ մարմինները հետաքննում են անօդաչու թռչող սարքերի ծագման երկիրը։
Սա Թուրքիայում դրոնների հայտնվելու առաջին դեպքը չէ: Հունիսի 14-ին մարտական անօդաչու թռչող սարք է հայտնաբերվել Սև ծովի ափին գտնվող Կասպիշյու լողափում։ Ռազմական ոստիկանության աշխատակիցները տարհանել են լողափի հանգստացողներին և խստացրել անվտանգության միջոցառումները շրջակայքում:
Հինգ օր անց մեկ այլ ԱԹՍ է հայտնաբերվել թուրքական Չակրազ լողափում։ Երկու անօդաչու թռչող սարքի ծագումը ճշտվում է:
Մայիսին էլ թուրքական BirGün թերթը հաղորդել էր, որ դրոն է ընկել երկրի հյուսիսում գտնվող Սամսուն քաղաքի փողոցներից մեկում: Ավելի ուշ Doğru Haber-ը, հղում անելով աղբյուրներին, հաղորդել էր, որ խոցված անօդաչու թռչող սարքը պատկանում է Ուկրաինային։