Սպիտակ տունը հերքել է Financial Times-ի հաղորդագրությունն այն մասին, որ ԱՄՆ անվտանգության երաշխիքներ ստանալու համար Ուկրաինան պետք է հրաժարվի տարածքային պահանջներից՝ ասել է ԱՄՆ վարչակազմի մամուլի քարտուղարի տեղակալ Աննա Քելլին։
Երեքշաբթի Financial Times-ը, հղում անելով քննարկումներին ծանոթ ութ անձանց, հաղորդել է, թե ԱՄՆ-ը, իբր, Կիևին հասկացրել է, որ Ուկրաինային անվտանգության երաշխիքներ կտրամադրի միայն այն դեպքում, եթե նա համաձայնի տարածքի նկատմամբ հավակնություններից հրաժարվելու գործարքին:
«Դա բացարձակապես սխալ է։ Խաղաղ գործընթացում ԱՄՆ-ի միակ դերը երկու կողմերի մերձեցումն է գործարքի կնքման համար։ Ցավալի է, որ Financial Times-ը թույլ է տալիս չարամիտ անանուն սուբյեկտներին ստել»,- հայտարարել է Քելլին:
Ռուսաստանի նախագահի օգնական Յուրի Ուշակովն ավելի վաղ Դոնբասից ուկրաինական զորքերի դուրսբերումն անվանել է խաղաղության ամբողջ ծրագրի կարևոր բաղադրիչ։