Պարոն Լավրովի տեղեկատվությունը ճիշտ և ամբողջական չէ: Պարոն Լավրովն օգտագործել է «իշխանությունների պայքար Եկեղեցու դեմ» ձևակերպումը: Այդ մասին ասուլիսի ժամանակ հայտարարեց ՀՀ ԱԳ նախարար Արարատ Միրզոյանը՝ անդրադառնալով լրագրողի դիտարկմանը, թե ՌԴ արտգործնախարար Սերգեյ Լավրովը հայտարարություն է տարածել, որ մտահոգված է ՀՀ իշխանությունների և Եկեղեցու միջև հարաբերություններով, ու չնայած դա Հայաստանի ներքին գործն է, Ռուսաստանը կցանկանար, որ իրավիճակը շուտափույթ կարգավորվեր:
«Պարոն Լավրովի տեղեկատվությունը բոլորովին չի համապատասխանում իրականությանը: Հայաստանում չկա իշխանությունների պայքար Եկեղեցու դեմ: Այն, ինչ նկատի ունի պարոն Լավրովը, հավանաբար վերաբերում է եկեղեցական մի քանի գործիչների կողմից ՀՀ քաղաքականությանը խառնվելուն, քաղաքական գործընթացների մասնակցելուն»,- ասաց նա՝ հիշեցնելով, որ համաձայն ՀՀ իրավապահ մարմիների՝ խոսքը ապօրինի հեղաշրջման փորձին մասնակցելու կամ այն նախաձեռնելու մասին է:
«Կրկին ուզում եմ ընդգծել՝ սա իրավական պրոցես է և սա ՀՀ-ի ներքին գործն է: Ինչպես դուք մեջբերեցիք իրավացիորեն [դիմում է լրագրողին.- խմբ.], ավելի լավ է՝ պարոն Լավրովը չխառնվի ՀՀ ներքին գործերին և ներքին քաղաքականությանը:
Կուզեի օգտվել առիթից և նույն կոչն անել պարոն Լավրովի ռուսական խորհրդարանական գործընկերներին, մեդիագործընկերներին: Կարծում եմ՝ Ռուսաստանի Դաշնության և՛ պաշտոնյաները, և՛ խորհրդարանականները, և՛ մեդիափորձագետները պետք է մեծ հարգանքով վերաբերվեն ՀՀ ինքնիշխանությանը և այլևս երբեք թույլ չտան իրենց խառնվել մեր ներքին գործերին»,- հայտարարեց Միրզոյանը:
Հիշեցնենք, որ Ռուսաստանի արտաքին գործերի նախարար Սերգեյ Լավրովը, անդրադառնալով Հայաստանի ներքաղաքական վերջին իրադարձություններին, հայտարարել է, որ Եկեղեցին միշտ էլ եղել է հայ հասարակության հիմնական հենասյուներից մեկը, ապա հավելել է, որ չէր ցանկանա այն «չարդարացված հարձակումների ենթարկվի՝ առանց որևէ լուրջ հիմքի»: