«ԱԺ հարգելի փոխնախագահներ, հարգելի պատգամավորներ, Կառավարության հարգելի անդամներ օգոստոսին մենք ներկայացրինք Կառավարության 2021-2026 թվականների գործունեության ծրագիրը, որը հավակնոտ նպատակներ է սահմանել ՀՀ խաղաղ, կայուն և ներառական զարգացման համար: Այսօր մենք ներկայացնում ենք այս 5-ամյա ծրագրի առաջին բյուջեն, որը կոչված է ամուր հիմքեր ստեղծելու մեր հնգամյա ծրագրի իրագործման համար»,- ԱԺ մշտական հանձնաժողովների համատեղ նիստերում ասաց ՀՀ վարչապետ Նիկոլ Փաշինյանը՝ շեշտելով, որ այն նախանշում է ծրագրերի իրագործման համար անհրաժեշտ պայմանները:
«2022 թվականի համար մենք նախատեսում ենք 7 տոկոս տնտեսական աճ՝ չնայած այն բանին, որ ընթացիկ տարվա մեծ մասը «նշանավորվեց» քաղաքական և անվտանգային անկայուն միջավայրով, մեր տնտեսությունը այսօր գերազանցում է աճի համար 2021 թվականին արված բոլոր կանխատեսումները: Մյուս կողմից Կառավարությունը տարվա արդյունքներով ավելիի հույս ունի»,- նշեց վարչապետը:
Նա գոհունակությամբ ընդգծեց, որ 2021 թվականի սեպտեմբերին ՀՀ-ում գրանցվել է վճարվող աշխատատեղերի թվի բացարձակ ռեկորդ՝ 651 141 վճարվող աշխատատեղ: «Հայաստանում ավելի բարձր ցուցանիշ երբեք չենք ունեցել»,- ասաց նա:
«Ընթացիկ տարվա բավականին բարձր՝ 6.4 տոկոս գնաճի ֆոնին կարևոր է ընդգծել, որ սեպտեմբերին համախառն աշխատավարձի ֆոնդը նախորդ տարվա սեպտեմբերի համեմատ աճել է 15.3 տոկոսով կամ 19 միլիարդ 308 միլիոն դրամով, իսկ մեկ աշխատողի աշխատավարձը՝ նախորդ տարվա սեպտեմբերի համեմատ, 11.9 տոկոսով կամ 23782 դրամով»,- նշեց Փաշինյանը:
Նա տեղեկացրեց, որ էականորեն՝ ավելի քան 20 տոկոսով աճել է արտահանումը. ընդ որում՝ աճել է ոչ միայն հումքային ռեսուրսի, այլև պատրաստի արտադրանքի և գյուղմթերքի արտահանումը:
