Սիրիայի անցումային կառավարության ուժերը բախվել են քրդական աշխարհազորայինների հետ երկրի արևելքում՝ Դեյր էզ-Զոր նահանգում։
Այս մասին հայտնել է Syria TV-ն։
Ըստ հեռուստաալիքի՝ Սիրիայի դեմոկրատական ուժերի (SDF) կոալիցիայի քրդական ուժերը փորձել են ներթափանցել Միհքան և ալ-Քիշմա շրջաններ, որոնք գտնվում են կառավարական բանակի պաշտպանության տակ, սակայն զորքերը հետ են մղել նրանց հարձակումները և պահպանել են իրենց դիրքերի վերահսկողությունը։
Երկու կողմերի միջև փոխհրաձգությունները շարունակվել են մի քանի ժամ։
Իր հերթին, SDF-ի հրամանատարությունը պնդում է, որ Եփրատ գետի արևելյան ափին գտնվող Աբու Համամ գյուղը ենթարկվել է Դամասկոսի կողմից աջակցվող խմբավորումների կրակին։ Քուրդ մարտիկները պատասխան կրակ են բացել և հարվածել հարձակվողների դիրքերին։ Հաղորդագրության մեջ նշվում է, որ միջադեպի հետաքննություն է ընթանում։
Հոկտեմբերի 21-ին SDF-ի ռազմական կոմիտեն հանդիպել է կառավարական պատվիրակության հետ Եփրատ գետի ափին գտնվող Տաբկա քաղաքում՝ Հալեպի, Ռաքքայի և Դեյր էզ-Զորի նահանգներում շփման գծում լարվածությունը քննարկելու համար։ Կողմերը համաձայնության են եկել հետագա սրացումը կանխելու միջոցառումների շուրջ։