Լուրերն այն մասին, որ «Վագներ» մասնավոր ռազմական ընկերության զինվորականները, իբր, շրջափակել են Դոնի Ռոստովի վարչական շենքերը, ինքը՝ «Վագներ»-ի առաջնորդ Պրիգոժինը, չի հաստատել կամ հերքել․ գրում է DW-ի ռուսական ծառայությունը։
«Բախումներ են տեղի ունենում այն վայրերում, որտեղ զինվորական ղեկավարությունը կեղծ տեղեկություններ է հաղորդում մարտիկներին։ Իսկ այնտեղ, որտեղ զինվորներն են դիմավորում մեզ՝ Ռուսաստանի Ազգային գվարդիան և ոստիկանները, նրանք ուրախ թափահարում են ձեռքերը, և շատերն ասում են՝ «Մենք ուզում ենք գալ ձեզ հետ»։ Մեզ միացածներն արդեն 60-70 հոգի են, թեև դեռ ճանապարհի քիչ հատվածն ենք անցել։ Կարծում եմ՝ բանակի կեսը պատրաստ է մեզ միանալ»,- ասել է Պրիգոժինը։
Տելեգրամյան ալիքները, մեկնաբանելով քաղաքի կենտրոնում զինվորականների լուսանկարները՝ շարունակում են պնդել, որ «Վագներ»-ը «գրավել է Ռոստովը»։ Այլ աղբյուրներում այս տեղեկատվության հաստատումը չկա։
Meduza-ն վկայակոչելով ուկրաինացի լրագրող Անդրեյ Ցապլիենկոյի տեսանյութը, գրում է, որ «Ռոստովը, հավանաբար, գրավել են «Վագներ»-ի ջոկատները։ Նրանք առանց կռվի գրավել են քաղաքի կենտրոնը»։ Տեսանյութի հեղինակը պնդում է, որ զրուցել է զինված անձանցից մեկի հետ, և նա հաստատել է, որ իրենք «Վագներ»-ի մարդիկ են։
Բացի այդ, ՏԱՍՍ գործակալությունը Ռոստովից իր լուսանկարներում Հարավային ռազմական օկրուգի շտաբը շրջափակած զինված մարդկանց կոչել է «Վագներ»-ի անդամներ։
Մինչդեռ Conflict Intelligence թիմի վերլուծաբան Ռուսլան Լևիևը կարծում է, որ Դոնի Ռոստովի վարչական շենքերը շրջափակած զինյալները «Վագներ»-ի գրոհայիններ չեն, այլ ՌԴ պաշտպանության նախարարության զինվորականներն են։ «Ովքեր հասցրել են հագնվել, հասել են այնտեղ, բոլորին ահազանգել են, նրանք ոչ թե «իրենց յուրայիններին են շրջապատում», այլ դիրքեր են գրավում շենքի շուրջը, որպեսզի պաշտպանեն այն։ Միևնույն ժամանակ, հակառակորդը կարող է արդեն մոտակայքում լինել, այնպես որ դուք պետք է վերահսկեք իրավիճակը տների տանիքի, պատուհանների շուրջ»,- ասել է Լևիևը։
Հիշեցնենք, որ «Վագներ» մասնավոր ընկերության հիմնադիր Եվգենի Պրիգոժինը ՌԴ ՊՆ-ին մեղադրել էր իր ճամբարներին հարվածներ հասցնելու համար: «Հրթիռային հարված է հասցվել «Վագներ» ընկերության ճամբարներին: Բազմաթիվ զոհեր կան: Ականատեսների խոսքով` հարվածը հասցվել է թիկունքից, այսինքն` ՌԴ ՊՆ զինծառայողների կողմից»,- ասել է Վագները` հավելելով, որ հաջորդ քայլն իրենցն է լինելու։ Պրիգոժինը նաև հայտարարել էր, որ պատրաստվում է ռազմական հեղաշրջում իրականացնել Ռուսաստանում։
