Սահմանադրական դատարանն աշխատակարգային որոշմամբ մերժել է վարույթ ընդունել Գագիկ Ծառուկյանի պատգամավորական լիազորությունները դադարեցնելու հարցով` Ազգային ժողովի խորհրդի դիմումը: Այդ մասին «Արմենպրես»-ի հետ զրույցում նշեց ՍԴ մամուլի քարտուղար Եվա Թովմասյանը:
«Որոշումն օրենքով սահմանված կարգով եռօրյա ժամկետում կուղարկվի կողմերին և կհրապարակվի Սահմանադրական դատարանի պաշտոնական կայքում»,- ասաց նա։
Նոյեմբերի 24-ին Ազգային ժողովի խորհուրդը դռնփակ նիստում քննարկել էր «Բարգավաճ Հայաստան» խմբակցության ղեկավար Գագիկ Ծառուկյանի լիազորությունները դադարեցնելու հարցով Սահմանադրական դատարան դիմելու հարցը:
Որոշման համար հիմք է հանդիսացել Կոռուպցիայի կանխարգելման հանձնաժողովի՝ հոկտեմբերի 26-ի «Ազգային ժողովի պատգամավորի կողմից անհամատեղելիության պահանջների խախտման մասին» 03/2020 եզրակացությունը:
«Սա ցույց է տալիս փոքրոգության մասին. հիմնական քաղաքական ուժի ղեկավարին այս բարդագույն շրջանում անօրինական գնաս ու ասես, որ զբաղվել ես բիզնեսով ու մանդատդ պիտի դնես, խայտառակ փոքրոգություն է», – լրագրողներին ասել էր ԲՀԿ պատգամավոր Միքայել Մելքումյանը։
