Ալմա Աթայի հռչակագիրը և Պրահայի պայմանավորվածությունը Հայաստանի անկախության, ինքիշխանության և տարածքային ամբողջականության մասին է և ոչ թե հակառակը: Այդ մասին Ազգային ժողով-Կառավարություն հարցուպատասխանի ժամանակ ասաց ՀՀ վարչապետ Նիկոլ Փաշինյանը՝ անդրադառնալով ԱԺ խոսնակ Ալեն Սիմոնյանի այն դիտարկմանը, թե ընդդիմությունը շահարկում է, որ Ալմա Աթայի հռչակագիրը և Պրահայի գործընթացը ծուղակ են, որի մեջ Հայաստանին ներքաշել են:
Փաշինյանը հաստատեց՝ ընդդիմության ներկայացուցիչները երկար ժամանակ է՝ այն խոսույթն են զարգացնում, թե պետք է հրաժարվել Պրահայի պայմանավորվածություններից և Ալմա Աթայի գործընթացից:
«Ես ուղիղ ասում եմ, որ սա նշանակում է հրաժարվել Հայաստանի անկախությունից, որովհետև Ալմա Աթայի հռչակագիրը և Պրահայի պայմանավորվածությունն արձանագրել են Հայաստանի տարածքային ամբողջականությունն այն բանից հետո, երբ դա տեղի է ունեցել 2022 թվականի հոկտեմբերի 6-ին: Բա ինչո՞ւ հարց չեք տալիս՝ դա ի՞նչ ժամանակաշրջան է. դա մի ժամանակաշրջան է, երբ Ադրբեջանը հարձակվել է Հայաստանի վրա, և մեր դաշնակիցներից եղել է զրո արձագանք:
Ընդ որում՝ ես հիշում եմ 2021-ի մայիսի իրադարձությունները, երբ մեր ընդդիմության հարգելի ներկայացուցիչները 2021-ի մայիսի համար ասում էին՝ բա Հայաստանի զորքը չի կռվել հլը, ՀԱՊԿ-ից եք աջակցություն ակնկալում, անգամ Հայաստանի զորքը մարտի մեջ չի մտել, դուք ի՛նչ իրավունքով եք ՀԱՊԿ-ին մեղադրում:
Հետո եկավ 2021-ի նոյեմբերը: Ասում էին, որ լուրեր են տարածվում՝ ոնց որ թե ՀՀ-ն այն հոդվածով չի դիմել ՀԱՊԿ-ին: Չե՞ք հիշում այդ ամբողջ խոսակցությունը:
Հետո եկավ 2022 թվականի սեպտեմբերը: Մեր ԶՈՒ-ն իր պարտքը… այսինքն՝ մտավ մարտի մեջ, հետո պարզվեց, չէ՞, զրո ռեակցիա: Մենք հասկացանք, որ այստեղ մեր անվտանգության ապահովման համար անհրաժեշտ է լեգիտիմ հիմքերին հղում անել՝ Հայաստանի տարածքային ամբողջականության:
Պրահայի մեր նպատակն Ադրբեջանի տարածքային ամբողջականությունը ճանաչելը չի եղել, դա Ադրբեջանի նպատակն է եղել, մեր նպատակը Հայաստանի անկախությունը, տարածքային ամբողջականությունը ճանաչելն է եղել: Ինչի դուք դա չգիտե՞ք, չեք կարող չիմանալ»,- ասաց նա:
