Եվրոպական խորհրդարանը 448 կողմ, 67 դեմ և 107 ձեռնպահ ձայներով ընդունել է Թուրքիայի վերաբերյալ տարեկան զեկույցը, որում անդրադարձ է արվել նաև Հայաստանի ու Հայոց ցեղասպանությանը:
«Եվրոպական խորհրդարանը ողջունում է Թուրքիայի և Հայաստանի միջև վերջին մերձեցումը` կապված երկկողմ շփումներ սկսելու որոշման, հատուկ ներկայացուցիչների նշանակման և երկու երկրների միջև թռիչքների վերսկսման հետ: Այս փորձը համարում ենք խիստ դրական զարգացում, որը դրականորեն է ազդում տարածաշրջանի բարգավաճման և անվտանգության վրա: Խրախուսում ենք երկու կողմերին շարունակել այդ ջանքերը՝ իրենց հարաբերությունները լիովին կարգավորելու նպատակով և կոչ ենք անում ԵՄ-ին ակտիվորեն աջակցել այս գործընթացին։
Խրախուսում ենք Թուրքիային ճանապարհ հարթել թուրք և հայ ժողովուրդների միջև իրական հաշտեցման, ներառյալ Հայոց ցեղասպանության վեճը լուծելու համար, և լիովին հարգել հայկական և այլ մշակութային ժառանգությունը պաշտպանելու իր պարտավորությունները: Հույս ենք հայտնում, որ դա կարող է հանգեցնել Հարավային Կովկասում հարաբերությունների կարգավորման դինամիկայի: Եվս մեկ անգամ խրախուսում ենք Թուրքիային ճանաչել Հայոց ցեղասպանությունը»,- ասվում է զեկույցում:
Զեկույցում Թուրքիայի իշխանություններին կոչ է արվում ակտիվացնել ջանքերը այդ երկրում հայերի և այլ փոքրամասնությունների ծանր վիճակի արդյունավետ կարգավորման ուղղությամբ:
