Պետություն-համայնք համագործակցությամբ իրականացվող սուբվենցիոն ծրագրերի ընթացքին հետևելու և իրականացված աշխատանքներին տեղում ծանոթանալու նպատակով՝ Շիրակի մարզպետ Նազելի Բաղդասարյանը մարզային իշխանության ներկայացուցիչների հետ այցելել է Ախուրյան համայնքի Շիրակ բնակավայրի մանկապարտեզ և Արթիկ համայնքի Փանիկ բնակավայրի մշակույթի տուն։
Շիրակ բնակավայրում ընթացքի մեջ են 46 երեխայի համար նախատեսված 2 խմբասենյակով մանկապարտեզի կառուցման աշխատանքները։ Ծրագրի ընդհանուր արժեքը կազմում է 74 մլն 122 հազար դրամ, գումարի 60 տոկոսը տրամադրելու է պետությունը, 40-ը՝ համայնքը։ Շինարարական աշխատանքներն իրականացնում է «Ույուտ Սենթր» ՍՊԸ-ն։
Մարզպետին է ներկայացվել նախագիծը, ծրագրի ընթացքն, ինչպես նաև առաջիկա անելիքները։ Նազելի Բաղդասարյանը կարևորել է աշխատանքների նորմալ իրականացումն ու նաև ենթակառուցվածքների լիարժեք կառուցումը։
«Յուրաքանչյուր ծրագրի դեպքում պետք է խնդրի լուծումն ամբողջական դիտարկենք, այլ ոչ՝ հատվածական։ Եթե խոսում ենք մանկապարտեզի կառուցման մասին, ապա պետք է նաև քննարկվի ու քայլեր ձեռնարկվի բոլոր ենթակառուցվածքների առումով»,- նշել է Շիրակի մարզպետը։
Մարզային իշխանությունները հետևել են նաև Փանիկի մշակույթի տան հիմնանորոգման աշխատանքների ընթացքին։ Սուբվենցիոն ծրագիրը մեկնարկել է 2021 թվականին, աշխատանքներն իրականացվելու են երկու փուլով։ Ծրագրի առաջին փուլի արժեքը 65 մլն 518 հազար դրամ է, շինարարական աշխատանքներն իրականացնում է «Շինարար-97» ՍՊԸ, գումարի 45 տոկոսը կհատկացնի պետությունը, 55-ը՝ համայնքը։ Երկրորդ փուլով մշակույթի տան նորոգման համար նախատեսվել է 100 մլն դրամ՝ 2022 թվականի սուբվենցիոն ծրագրի շրջանակներում։
Շիրակի մարզպետը ծանոթացել է մարզում իրականացվող սուբվենցիոն ծրագրերի ընթացքին
նախորդ գրառումը