ՀՀ ԱԺ նախագահի հայտարարությունը Արմեն Սարգսյանի հրաժարականի դիմումի մասին
ԱԺ նախագահ Ալեն Սիմոնյանը Հանրապետության նախագահի հրաժարականի դիմումի կապակցությամբ հանդես է եկել հայտարարությամբ:
«Սահմանադրության 142-րդ հոդվածի և «Ազգային ժողովի կանոնակարգ» սահմանադրական օրենքի 147-րդ հոդվածի 1-ին մասի համաձայն՝ Հանրապետության Նախագահը հրաժարականի դիմում է ներկայացրել:
«Ազգային ժողովի կանոնակարգ» սահմանադրական օրենքի 147-րդ հոդվածի 2-րդ մասի համաձայն` եթե հրաժարականի հրապարակումից հետո՝ մեկ շաբաթվա ընթացքում, համապատասխան պաշտոնատար անձը գրավոր դիմումով՝
1) հետ է վերցնում հրաժարականի մասին իր դիմումը, ապա Ազգային ժողովի նախագահն այդ մասին հանդես է գալիս հայտարարությամբ.
2) հետ չի վերցնում հրաժարականի մասին իր դիմումը, ապա նրա լիազորությունների դադարման մասին կազմվում է արձանագրություն, որն ստորագրում և հրապարակում է Ազգային ժողովի նախագահը:
Արձանագրության հրապարակման պահից հրաժարականը համարվում է ընդունված»,- նշված է ՀՀ ԱԺ նախագահի հայտարարության մեջ:
Հանրապետության նախագահի հրաժարականին ԱԺ նախագահն անդրադարձել է ԱԺ այսօրվա նիստում:
