Ազգային ժողովը քննարկում է Կառավարության ներկայացրած՝ ««Հանրակրթության մասին» օրենքում փոփոխություններ և լրացումներ կատարելու մասին» օրենքի նախագիծը երկրորդ ընթերցմամբ ընդունելու հարցը:
ԿԳՄՍ նախարարի տեղակալ Ժաննա Անդրեասյանը կանգ առավ հիմնական բովանդակային հստակեցումների վրա:
«Կարևոր եմ համարում այլընտրանքային հանրակրթական ծրագրի հստակ սահմանման ներառումը նախագիծ, որ բացակայում էր գործող օրենքում: Կարևորում եմ նաև ուսումնական պլանի անհատական բաղադրիչի սահմանման հստակեցումը, որով շեշտել ենք սովորողի ընտրության կարևորությունը, ինչպես նաև այն հանգամանքը, որ անհատական բաղադրիչով նախատեսված նախագծային հետազոտական աշխատանքներն ու խմբակները դպրոցը կարող է իրականացնել այլ կառույցների հետ համագործակցությամբ»,- ասաց Անդրեասյանը:
Սա նշանակում է, որ սպորտի կամ արվեստի դասերը կարող են անցկացվել մարզադպրոցների, գեղարվեստի դպրոցների հետ համագործակցությամբ՝ ապահովելով սովորելու միասնական միջավայր:
Անդրեասյանը կարևոր համարեց նաև օրենքի նախագծում հիվանդանոցային պայմաններում երկարատև բուժում ստացող, ինչպես նաև քրեակատարողական հիմնարկներում գտնվող անձանց կրթության իրավունքի իրացման համար առավել բարենպաստ պայմանների սահմանումը:
«Տարբեր երկրներում առկա են արդյունավետ աշխատանքի մոդելներ երեխաների կրթության կազմակերպման մասով: Տարբեր հետազոտություններով ապացուցված է, թե ինչ բարերար ազդեցություն է թողնում կրթությունը բուժման գործընթացի վրա՝ բարձրացնելով դրա արդյունավետությունը»,- ասաց փոխնախարարը:
