Ֆրանսիայի և Իսրայելի դիրքորոշումները պաղեստինյան ՀԱՄԱՍ շարժման դեմ պայքարի մեթոդների վերաբերյալ տարբեր են։ Այս մասին, ինչպես գրում է ՏԱՍՍ գործակալությունը, France Info հեռուստաալիքին տված հարցազրույցում ասել է Ֆրանսիայի արտաքին գործերի նախարար Կատրին Կոլոննան։
Նրա խոսքով՝ Իսրայելի պաշտպանության բանակը պետք է կետային գործողություններ իրականացնի՝ նախազգուշական միջոցներ ձեռնարկելով Պաղեստինի քաղաքացիական բնակչությանը պաշտպանելու համար:
«Ռմբակոծությունները չափազանց մեծ վտանգ են ներկայացնում բնակչության համար: Անհրաժեշտ է որքան հնարավոր է շուտ ավելի մեծ ծավալի օգնություն հասցնել քաղաքացիական բնակչությանը: Մենք պետք է Իսրայելից պահանջենք բացել նոր միջանցքներ այդ օգնությունը հասցնելու համար և թույլ տանք այն բաշխել Գազայի ողջ հատվածում, հատկապես հյուսիսում», – ընդգծել է Կոլոննան: