Մարտի 15-ից ուժի մեջ է մտնում հանրային սննդի վայրերում՝ ինչպես փակ, այնպես էլ բաց տարածքներում ծխելու արգելքը: Այս մասին Կառավարության նիստի ընթացքում հիշեցրեց ՀՀ առողջապահության նախարար Անահիտ Ավանեսյանը:
«Ուզում եմ ընդգծել Կառավարության կարևոր հանձնառությունը կանխարգելիչ, կարևոր այս փոփոխությունների հետ կապված: Վիճակագրական տվյալները ցույց են տալիս, որ ոչ վարակիչ հիվանդություններից՝ սրտանոթային հիվանդություններ, քաղցկեղ, մենք ունենք մահացության բավականին բարձր բեռ: Այս բոլոր սահմանափակումներն ուղղված են մարդկանց առողջությունը պահպանելուն, նաև մեր երիտասարդներին պաշտպանելու նման վնասակար սովորություններից»,- ասաց Ավանեսյանը:
ՀՀ վարչապետ Նիկոլ Փաշինյանն էլ ավելացրեց, որ պետք է քաջալերել մարդկանց ավելի քիչ ծխել:
«Այս արգելքի ամենակարևոր նպատակը հանրային առողջության պահպանումն է»,- ասաց նա:
