Բելառուսի նախագահ Ալեքսանդր Լուկաշենկոն ասել է, որ Մինսկը դեմ չէ Ռուսաստանի հետ ինտեգրմանը, սակայն դա հնարավոր է միայն առանց պետականությունն ու ինքնիշխանությունը կորցնելու, Tert.am-ի փոխանցմամբ, այս մասին գրում է ՏԱՍՍ-ը:
«Երբ մենք խոսում ենք ինտեգրացիայի մասին, մենք պետք է հստակ հասկանանք. ցանկացած ինտեգրում՝ առանց պետականության և ինքնիշխանության կորստի», – ասել է նա լրագրողների և հասարակության ներկայացուցիչների հետ հանդիպմանը:
«Մենք երբեք դեմ չենք եղել ամենամոտ դաշինքին, բայց մեզ միշտ պահել են հեռավորության վրա, իսկ այժմ դուք (Ռուսաստանը) մեզ հեռավորության վրա եք պահում», – հավելել է Լուկաշենկոն:
Ինչպես նշել է ղեկավարը, «ակնարկներ են գալիս առ այն, որ ինտեգրումը հասկացվում է որպես Բելառուսի մուտքը Ռուսաստան»:
«Մենք ինքնիշխան և անկախ պետություն ենք: Երբ ես լսում եմ այս ակնարկները Ռուսաստանին միանալու մասին, ես միշտ Պուտինի գլխով մտածում եմ՝ արդյոք Ռուսաստանին մեկ այլ գլխացա՞վ է պետք: Ոչ: Ահա թե ինչպես է դա հասկանում Ռուսաստանի նախագահը: Ինտեգրվելու, ամբողջ տնտեսության մեջ ինտեգրումը զարգացնելու համար պետք չէ ինչ -որ մեկին վերցնել ու ընդգրկել կազմում»,-ասել է Բելառուսի նախագահը:
Ըստ Լուկաշենկոյի, ցանկացած միջպետական միության հիմքը հավասարությունն է, այդ թվում` տնտեսական հարցերում:
«Ցանկացած միության հիմքը նույն պայմաններն են, հավասարությունը: Հավասարությունը մարդկանց համար, ինչը մենք արել ենք շատ առումներով: Սա և՛ ռուսների, և՛ բելառուսների մեծ արժանիքն է: Բայց ինչպե՞ս կարող եք ինտեգրվել, եթե բնական գազի գները ձեզ մոտ երկու-երեք անգամ ցածր են, քան Բելառուսում», – ասել է նա:
