Հեռուստահաղորդավարուհի, «Գազպրոմ-Մեդիա» հոլդինգի գլխավոր տնօրենի տեղակալ Թինա Կանդելակին անդրադարձել է Արցախի նախկին պետնախարար Ռուբեն Վարդանյանի ձերբակալմանը:
«Ընկերներ, իմ ընկերոջը՝ Լեռնային Ղարաբաղի նախկին պետնախարար Ռուբեն Վարդանյանին, ձերբակալել են ադրբեջանցի զինվորականները», – թելեգրամյան ալիքում գրել է Կանդելակին։
Նշենք, որ Ադրբեջանի պետական անվտանգության ծառայությունից հաստատել են Արցախի նախկին պետնախարար Ռուբեն Վարդանյանի ձերբակալման մասին տեղեկությունը։ Տեղի ԶԼՄ-ների փոխանցմամբ՝ նրան տեղափոխել են Բաքու:
Հիշեցնենք, որ նրա կինը՝ Վերոնիկա Զոնաբենդը, հանդես է եկել հայտարարությամբ՝ հայտնելով Վարդանյանի ձերբակալման մասին:
«Այսօր առավոտյան ամուսինս՝ բարերար, գործարար, Արցախի Հանրապետության նախկին պետնախարար Ռուբեն Վարդանյանը, ձերբակալվել և գերեվարվել է Ադրբեջանի իշխանությունների կողմից սահմանին, երբ ադրբեջանական օկուպացիայից փախնող հազարավոր այլ հայերի հետ փորձում էր հեռանալ Արցախից: Շրջափակման տասը ամսվա ընթացքում Ռուբենն ուս ուսի տված կանգնել է արցախցիների կողքին, տարել դժվարությունները, նրանց հետ գոյատևման պայքար մղել։ Աղոթում եմ, որ ամուսինս անվնաս ազատ արձակվի և հայցում եմ ձեր աջակցությունը»,- ասված է հայտարարությունում:
