Արցախի Հանրապետության ներքին գործերի նախարարության ոստիկանության տարբեր ստորաբաժանումներում 2021թ. առաջին չորս ամսիներին 78 անձի կողմից կամովին հանձնվել է 57 ինքնաձիգ, 3 գնդացիր, 5 նռնականետ: «Արմենպրես»-ի հաղորդմամբ՝ այս մասին տեղեկացնում են Արցախի գլխավոր դատախազության հանրային կապերի բաժնից:
Դատախազության տվյալներով՝ նույն ժամանակահատվածում կամովին հանձնվել է 9 հրացան, 8 ատրճանակ, 53 նռնակ, նռնակի 42 պայթուցիչ, 1 ական, ինքնաձիգի 98 պահեստատուփ, 2 սվին-դանակ, ատրճանակի, ինքնաձիգի և գնդացրի 19671 փամփուշտ, նռնականետի 3 պայթուցիչ և 1 արկ:
Դատախազությունը հորդորում է քաղաքացիներին շրջանառությունն արգելված նման առարկաներ ունենալու դեպքում դրանք հանձնել ոստիկանության մարմիններին՝ միաժամանակ հիշեցնելով, որ ապօրինի պահվող զենքը, ռազմամթերքը, պայթուցիկ նյութերը և պայթուցիկ սարքերը կամովին հանձնած անձը ենթակա չէ քրեական պատասխանատվության:
«Դատախազությունը ևս հասկանում է առանձին դեպքերում զենքը կամ ռազմամթերքը արտաքին վտանգներից պաշտպանվելու նպատակով պահելու` քաղաքացիների շարժառիթն ու նպատակը: Այդուհանդերձ, վստահ ենք, որ առավել վտանգի աղբյուր հանդիսացող նման առարկաները քաղաքացիներին պետք է հատկացվեն բացառապես պետական վերահսկողության շրջանակում` զենք պահելու կամ կրելու իրավունք հայցող անձի անհատական բոլոր բնութագրիչները հետազոտելուց հետո»,-նշել են դատախազությունից՝ հորդորելով համագործակցել իրավապահ մարմինների հետ և նրանց հանձնել պոտենցիալ վտանգի աղբյուր հանդիսացող` ապօրինի պահվող զենքը, ռազմամթերքը, պայթուցիկ նյութերն ու սարքերը:
