Ամփոփելով 2018-ից ի վեր մարզերում սուբվենցիոն ծրագրերով և Կառավարության կապիտալ ներդրումներով կատարված աշխատանքները՝ ՀՀ վարչապետ Նիկոլ Փաշինյանը գործադիրի այսօրվա նիստին նշեց, որ արդյունքը տպավորիչ է, իսկ ծավալը՝ ահռելի:
Ըստ վարչապետի՝ այս հարցում էական նշանակություն է ունեցել ոչ միայն համայնքների խոշորացումը, այլև համայնքներում ընտրակարգի փոփոխությունը: Բայց դեռ կան խնդիրներ, որոնք կապված են այն հանգամանքի հետ, որ ավագանիները չեն յուրացրեն իրենց լիազորությունների սահմանները:
«Ավագանիները պետք է դեռևս յուրացնեն այն գործիքակազմը և լիազորությունների սահմանները, որոնք ունեն, որովհետև շատ դեպքերում մենք բախվում ենք իրավիճակի, երբ ավագանու ներկայացուցիչները բարձրացնում են հարցեր, և մեր ուսումնասիրությունը ցույց է տալիս, որ այս հարցերը ավագանու լուծման տիրույթում են, բայց նրանք այդ հարցերի լուծումներն ակնկալում են, ասենք, Կառավարությունից, վարչապետից կամ նախարարից, մինչդեռ հենց իրենք են այն մարդիկ, որոնք ՀՀ օրենսդրությամբ պետք է այդ լիազորություններն իրականացնեն»,- նկատեց վարչապետը:
Փաշինյանը նաև տեղեկացրեց, որ խնդրի լուծման համար ՏԿԵՆ-ը վերապատրաստման կուրսեր է իրականացնում, որպեսզի ավագանու անդամները մեծացնեն իրենց լիազորությունների իմացության վերաբերյալ կարողությունները:
