Հանրապետականների կողմից վերահսկվող ԱՄՆ Կոնգրեսի Ներկայացուցիչների պալատը ուրբաթ՝ հուլիսի 18-ին, ընդունել է մի օրինագիծ, որը նախատեսում է միլիարդավոր դոլարներով կրճատել արդեն հաստատված կառավարության ծախսերը՝ ուղղված արտաքին օգնությանն ու հանրային հեռարձակողների համար նախատեսված դաշնային ֆինանսավորմանը։ Օրինագիծը նախաձեռնել է նախագահ Դոնալդ Թրամփը, գրում է DW-ն։
Ներկայացուցիչների պալատում օրենքի օգտին քվեարկել է 216 կոնգրեսական, դեմ՝ 213-ը։ Այս փաստաթուղթն ավելի վաղ ընդունվել էր Սենատում։ Այժմ Թրամփը պետք է ստորագրի օրենքը, որպեսզի այն ուժի մեջ մտնի։
Օրենքը նախատեսում է մոտ 9 միլիարդ դոլարի ծախսերի կրճատում, այդ թվում՝ Հանրային հեռարձակման կորպորացիայի (CPB) համար արդեն խոստացված 1,1 միլիարդ դոլարը։ Այս կազմակերպությունը պատասխանատու է պետական միջոցները հանրային հեռարձակողներին՝ Ազգային հանրային ռադիոյին և Հանրային հեռարձակման ծառայությանն ու դրանց դուստր կազմակերպություններին բաշխելու համար։ CPB-ի տվյալներով՝ այն աջակցում է Միացյալ Նահանգներում ավելի քան 1500 տեղական հանրային հեռուստատեսային և ռադիո կայանների։
Սպիտակ տունը պնդում է, որ հանրային լրատվամիջոցների համակարգը քաղաքականապես կողմնակալ է պահպանողական կուսակցության նկատմամբ, հետևաբար, այն համարում է ավելորդ ծախս։
Գրեթե 8 միլիարդ դոլարով կկրճատվեն նաև արտասահմանյան օգնության ծրագրերը, այդ թվում՝ շարունակական երաշտներից, հիվանդություններից և քաղաքական անկարգություններից տուժած երկրներին տրամադրվող օգնությունը։
Զարգացող երկրներում տնտեսության և ժողովրդավարական ինստիտուտների զարգացմանն ուղղված ծրագրերի ծախսերը նույնպես կրճատվել են 4,15 միլիարդ դոլարով։
Դեմոկրատները նախազգուշացրել են, որ օրինագիծը կվնասի ԱՄՆ հեղինակությանը և հնարավորություն կտա Չինաստանին լրացնել բացը։ Հանրապետականները պնդում են, որ ծախսերի կրճատումը կխրախուսի մյուս երկրներին ավելին անել մարդասիրական ճգնաժամի ընթացքում։