Ծնունդով ադրբեջանցի Միխայիլ Գուսմանը հեռացվել է ռուսական առաջատար լրատվական գործակալության՝ ՏԱՍՍ-ի գլխավոր տնօրենի առաջին տեղակալի պաշտոնից։
Համապատասխան որոշումը ստորագրել է ՌԴ վարչապետ Միխայիլ Միշուստինը:
«Միխայիլ Սոլոմոնովիչ Գուսմանին ազատել դաշնային պետական ունիտար ձեռնարկության Ռուսաստանի «Տեղեկատվական հեռագրային գործակալության (ԻՏԱՌ-ՏԱՍՍ)» գլխավոր տնօրենի առաջին տեղակալի պաշտոնից», – ասվում է փաստաթղթում։
Նշենք՝ օրեր առաջ Գուսմանը ուղևորվել էր ադրբեջանական հսկողության տակ անցած Շուշի, մասնակցել այնտեղ մեդիաֆորումին, որին մասնակցում էր Ադրբեջանի նախագահ Իլհամ Ալիևը:
Գուսմանը և մյուսները գովեստի խոսքեր են շռայլել Ալիևի հասցեին: EADaily-ն, օրինակ, հայտնել է, որ ռազմական բլոգեր Սերգեյ Կոլյասնիկովը ուշադրություն է հրավիրել այն բանի վրա, թե ինչպես են Ռուսաստանի ներկայացուցիչները հաճոյախոսություններ հղել Ադրբեջանի նախագահ Իլհամ Ալիևի հասցեին, որը դեմարշ է արել Ռուսաստանի դեմ: Կոլյասնիկովին վրդովեցրել են քաղաքագետ Սերգեյ Մարկովի և լրագրող Միխայիլ Գուսմանի մեկնաբանությունները հատկապես:
Կարելի է ենթադրել, որ Գուսմանի հեռացմանը նպաստել են հենց այս իրադարձությունները, որովհետև ինչպես հայտնի է՝ ռուս-ադրբեջանական հարաբերությունները վերջին շրջանում բարդ փուլ են ապրում՝ ուղեկցված սկանդալներով ու փոխադարձ մեղադրանքներով: