ԱԺ-ում բացվել է քաղաքացիների ընդունելության վերափոխված կենտրոնը

Հուլիսի 13-ին տեղի է ունեցել ՀՀ Ազգային ժողովի քաղաքացիների ընդունելության վերափոխված կենտրոնի բացումը:

«Կենտրոնի վերաբացումը իրականացվել է մեր գործընկերների` ՄԱԿ-ի Զարգացման ծրագրի «Նոր Հայաստան` ժամանակակից խորհրդարան»-ի հետ համատեղ ջանքերով: Ծրագիրը ֆինանսավորվում է Շվեդիայի և ՄԹ կառավարությունների կողմից: Խորհրդարանի` քաղաքացիների վերափոխված ընդունելության կենտրոնը հնարավորություն կտա վերջիններիս ավելի արդյունավետ իրացնել իրենց իրավունքները, ՀՀ Ազգային ժողովի աշխատանքների մեջ ներգրավվածությունը»,- նշել է ՀՀ Ազգային ժողովի աշխատակազմի ղեկավար-գլխավոր քարտուղար Վահան Նարիբեկյանը:

«Մենք կանխատեսում ենք, որ նոր, հարմարավետ պայմանները կնպաստեն քաղաքացիների ավելի մեծ հոսքին, ինչպես նաև աշխատակազմի արդյունավետ աշխատանքին: Հարմարավետ պայմանները, ժամանակակից տեղեկատվական տեխնոլոգիաները, քաղաքացիների համար մշակված պարզեցված կարգերն ու ուղեցույցները կդյուրացնեն ՀՀ Ազգային ժողովի պատգամավորների և քաղաքացիների կապը: Սա «Նոր Հայաստան` ժամանակից խորհրդարան» ծրագրի հետ համատեղ մշակվող այցելուների կենտրոնի ստեղծման առաջին և էական քայլն է խորհրդարանական ժողովրդավարական կենտրոնի հայեցակարգի շրջանակում»,- նշել է աշխատակազմի ղեկավարը:

Անդրադառնալով առաջիկայում իրականացվելիք միջոցառումներին` Վահան Նարիբեկյանը նշել է, որ դրանց առանցքում է «Ակտիվ քաղաքացու» ստեղծման գաղափարը, որին ևս աջակցում է «Նոր Հայաստան` ժամանակակից խորհրդարան» ծրագիրը:

Միջոցառումների նպատակն է բարձրացնել ՀՀ քաղաքացիների իրազեկվածությունը` խորհրդարանական ժողովրդավարության հիմնարար սկզբունքների մասին ու նպաստել ներառական և իրազեկ մասնակցային գործընթացներին:

Միջոցառմանը մասնակցել են «Քաղաքացիական պայմանագիր» խմբակցության պատգամավոր Հռիփսիմե Գրիգորյանը, Հայաստանում Շվեդիայի դեսպան Պատրիկ Սվենսոնը, Հայաստանում ՄԱԿ-ի Զարգացման ծրագրի մշտական ներկայացուցիչ Նաթիա Նացվլիշվիլին, ՀՀ ԱԺ աշխատակազմի և ՄԱԶԾ «Նոր Հայաստան` ժամանակակից խորհրդարան» ծրագրի ներկայացուցիչները:

«Մենք հավատացած ենք, որ այս ծրագիրն առանցքային կարևորություն ունի` էլ ավելի ամրապնդելու և ուժեղացնելու ՀՀ Ազգային ժողովի դերակատարությունը կառավարման համակարգում»,- ընդգծել է Հայաստանում Շվեդիայի դեսպան Պատրիկ Սվենսոնը: Նրա խոսքով` այս ծրագրի շնորհիվ ձեռք են բերվել արդյունքներ, որոնք մատնանշում են գործիքներն ու մեխանիզմները` կենտրոնանալով ավելի որակյալ ծառայությունների թափանցիկության վրա:

Հայաստանում ՄԱԿ-ի Զարգացման ծրագրի մշտական ներկայացուցիչ Նաթիա Նացվլիշվիլին նշել է. «Սա մեր բազմաթիվ ձեռքբերումներից մեկն է, բայց այն առանցքային նշանակություն ունի, որովհետև ավելի է ամրապնդում խորհրդարանի ներկայացուցչական գործառույթը»: Նրա խոսքով` այս վերափոխված և արդիականացված քաղաքացիների ընդունելության կենտրոնն արտացոլում և ներկայացնում է նոր Հայաստանի հայեցակարգը և տեսլականը` ավելի մոտ լինել ժողովրդին: «Մենք պիտի համագործակցենք և ամրապնդենք այն ջանքերը, որոնք ուղղված են ՀՀ ԱԺ-ի կողմից հանրային ներգրավածության ընդլայնմանը»,- ընդգծել է Նաթիա Նացվլիշվիլին:

ՀՀ ԱԺ «Քաղաքացիական պայմանագիր» խմբակցության պատգամավոր Հռիփսիմե Գրիգորյանը ՀՀ Ազգային ժողովի նախագահի անունից ողջունել է հյուրերին և շնորհակալություն հայտնել այս կարևոր միջոցառմանը մասնակցելու համար: «Ուզում եմ մեկ անգամ ևս շնորհակալություն հայտնել դեսպաններին և ձեր թիմերին անձնական ներգրավվածության համար: Այն  ցույց է տալիս ձեր վերաբերմունքը, թե ինչ անմիջականությամբ և կարևորությամբ եք դուք վերաբերվում այս ծրագրին»,- ասել է պատգամավորը:

Նշենք, որ «Նոր Հայաստան` ժամանակակից խորհրդարան» ծրագիրը մեկնարկել է 2019 թ., որի գաղափարն է աջակցել ՀՀ ԱԺ-ին և աշխատակազմին` հզորացնելու կարողությունները պետական կառավարման համակարգում իր նոր ու հիմնավորապես ընդլայնված դերի շրջանակում օրենքների մշակման, վերահսկողության և ներկայացուցչականության ապահովման առանցքային գործառույթների իրականացման հարցում: