Արցախի Ասկերանի շրջանի Խրամորթ գյուղի բնակիչներից արդեն 2 օր է, ինչ ադրբեջանցիները պահանջում են լքել գյուղը։ Sputnik Արմենիայի հետ զրույցում տեղեկություն են հայտնել Ասկերանի վարչական շրջանի աշխատակազմից։
«Ինչպես երեկ, այնպես էլ այսօր, ադրբեջանցիները բարձրախոսով հայտարարում են, որ գյուղը ադրբեջանական տարածք է և տեղի բնակիչները պետք է լքեն այն։ Նրանք գրական հայերենով են հայտարարություն անում»,–ասացին աշխատակազմից։
Նա հավելեց, որ գյուղի բնակիչներից որևէ մեկը չի պատրաստվում լքել գյուղը, նրանք սադրանքների չեն տրվում և գիտեն, որ ադրբեջանցիների նպատակը խրամորթցիներին ահաբեկելն է։
Նշենք, որ համացանցում ձայնագրություն է տարածվել, որտեղ լսվում է ադրբեջանցիների ձայնը։
«Անհապաղ հեռացեք տարածքից, հակառակ դեպքում ձեր նկատմամբ ուժ կկիրառվի։ Կորուստների համար պատասխանատվությունն ընկնելու է ձեր վրա։ Մի՛ վտանգեք ձեր և ձեր ընտանիքի անդամների կյանքը։ Լքե՛ք տարածքը, դուք գտնվում եք Ադրբեջանի Հանրապետության տարածքում։ Այստեղ ցանկացած գործունություն կարգավորվում է Ադրբեջանի օրենքներով»,–ասվում է ձայնագրության մեջ։
Ասկերանի վարչական շրջանի աշխատակազմից հայտնեցին, որ շրջանի վարչական ղեկավարը` Համլետ Ապրեսյանը, Խրամորթ է գնացել։ Ռուս խաղաղապահները նույնպես տեղեկացված են դեպքի մասին։
Ի դեպ, Խրամորթում նաև 11 տեղահանված ընտանիք են ապաստանել։
Հիշեցնենք, որ փետրվարի 15-ին ժամը 15:30-ի սահմաններում, Արցախի Ասկերանի շրջանի Խրամորթ համայնքի հարևանությամբ ամրակայված ադրբեջանական դիրքից հրազենով կրակ էին բացել նույն համայնքի վարչական տարածքում տեղակայված վարելահողում տրակտորով աշխատանքներ կատարող անձանց ուղղությամբ: Քաղաքացիներին հաջողվել է փրկվել ռուս խաղաղապահների միջամտության շնորհիվ: Կրակոցների հետևանքով վնասվել է տրակտորի անվադողը։
«Հեռացեք տարածքից, հակառակ դեպքում…». ադրբեջանցիները հայերեն պահանջում են լքել Խրամորթը:
Տեսանյութը՝ համացանցից։
https://bit.ly/3tdVYHN
Опубликовано Sputnik Արմենիա Суббота, 26 февраля 2022 г.