Սամվել Կարապետյանի ազատ արձակման պահանջով այսօր հավաք է կազմակերպվել Երևանի Դիանա Աբգարի անվան այգում: Համացանցում տեսանյութեր ու ձայնագրություններ են տարածվել, թե ինչպես են Հայաստանի էլեկտրական ցանցերի աշխատակիցներին հավաքում՝ այնտեղ ուղղորդելու համար:
Հավաքին ներկա են եղել հոգևորականներ, այդ թվում Գարեգին Բ կաթողիկոսի եղբայրը՝ Ռուսաստանի և Նոր Նախիջևանի թեմի առաջնորդ Եզրաս արքեպիսկոպոս Ներսիսյանը:
Ելույթ ունեցողների թվում է եղել փաստաբան Արամ Վարդևանյանը, որը նաև Ռոբերտ Քոչարյանի պաշտպանն է, «Հայաստան» խմբակցության պատգամավոր Աղվան Վարդանյանը և ուրիշներ: Հավաքվածները երթով շարժվել են դեպի Նալբանդյան փողոց՝ ԱԱԾ մեկուսարան, որտեղ գտնվում է Կարապետյանը։
Ի դեպ, հավաքի մասնակիցները կրել են միանման շապիկներ ու գլխարկներ՝ «մեր ձևով» գրությամբ:
Հիշեցնենք, Սամվել Կարապետյանը հարցազրույցում հայտարարել էր, թե ինքը եկեղեցու կողքին է. «եթե քաղաքական գործիչներին չհաջողվի, ապա մենք մեր ձևով ենք միջամտելու եկեղեցու դեմ արշավին»,- հավելել էր նա: