ԱՄՆ նախագահ Դոնալդ Թրամփը հայտարարել է, որ Չինաստանի նախագահ Սի Ծինփինի հետ հեռախոսազրույցի ժամանակ քննարկել է Ուկրաինայում հակամարտության կարգավորման անհրաժեշտությունը: Սպիտակ տան ղեկավարն այդ մասին գրել է X սոցիալական ցանցի իր էջում:
«Մենք առաջընթաց ենք գրանցել բազմաթիվ կարևոր հարցերում, ներառյալ առևտուրը, ֆենտանիլի խնդիրը, Ռուսաստանի և Ուկրաինայի միջև պատերազմին վերջ դնելու անհրաժեշտությունը, ինչպես նաև TikTok-ի գործարքի հաստատումը»,- ասվում է գրառման մեջ:
Թրամփը հայտարարել է, որ համաձայնել է հանդիպել իր չինացի գործընկերոջ հետ Հարավային Կորեայում կայանալիք Ասիա-խաղաղօվկիանոսյան տնտեսական համագործակցության (APEC) գագաթնաժողովում:
Չինաստանի կառավարությունն իր հերթին առաջնորդների զրույցը որակել է «դրական և անկեղծ»: