Այսօր «Համայնքային համախմբման և աջակցության կենտրոն» ՀԿ նախագահ, բնապահպան Օլեգ Դուլգարյանն իր ֆեյսբուքյան էջում գրառում է կատարել, որտեղ բարձրաձայնել է Տավուշի մարզի Արճիս գյուղի բնակիչների լրջագույն մտահոգությունը։ Գյուղի ֆերմերները ահազանգել են, որ Դեբեդ գետը ստացել է կաթնային երանգ, ինչը տեսանելի ապացույց է հնարավոր թափոնների առկայության մասին։ Բնակիչները ջուրը հիմնականում օգտագործում են գյուղատնտեսական ոռոգման նպատակով, ինչը կարող է լուրջ հետևանքներ ունենալ: Բնապահպանության և ընդերքի տեսչական մարմինը, ստանալով ահազանգը, սկսել է ուսումնասիրական աշխատանքներ՝ պարզելու աղտոտման աղբյուրը: Ընթացքի մեջ է ջրի նմուշառման գործընթացը։