Ադրբեջանի պաշտպանության նախարարությունը հաղորդել է, որ բնակչության տարհանման նպատակով Լաչինի ճանապարհին և այլ ուղղություններով հումանիտար միջանցքներ կբացվեն և ընդունման կետեր կստեղծվեն:
Այսպիսով, փաստորեն, Բաքուն տալիս է Լեռնային Ղարաբաղի հայաթափման իր պլանի գործնական մեկնարկը:
Ինչպես տեղեկացրել էինք՝ Ադրբեջանը ռմբակոծում է Լեռնային Ղարաբաղը, այդ թվում՝ Ստեփանակերտը: Քաղաքում հայտարարվել է օդային տագնապ: Հարձակման մասին հայտնում են թե՛ տեղի բնակիչները, թե՛ պաշտոնական Բաքուն: Ադրբեջանի Զինված ուժերի տարածած հաղորդագրությամբ՝ Բաքուն խաղաղ բնակչության հրետակոծությունն անվանում է «հակաահաբեկչական գործողություն», որի նպատակը «Սահմանադրական կարգի վերականգնումն» է համարում և ընդգծում, որ օպերացիայի մասին տեղյակ են պահել ռուս խաղաղապահներին և ռուս-թուրքական մոնիտորինգային կենտրոնի ղեկավարությանը:
ԼՂ ՊՆ-ից հայտնում են, որ սեպտեմբերի 19-ին` ժամը 13։00-ի սահմաններում, ադրբեջանական զինուժը շփման գծի ամբողջ երկայնքով խախտել է հրադադարը՝ հասցնելով հրթիռահրետանային հարվածներ։
ԼՂ բնակիչները տարածել են կադրեր, որոնցում լսվում են հրետակոծության և ԱԹՍ-ի աշխատանքի ձայներ, Ստեփանակերտին մոտ բարձունքներում երևում են պայթյուններ: