Ազգային ժողովում Կառավարության հետ հարցուպատասխանի ընթացքում վարչապետ Նիկոլ Փաշինյանն անդրադարձել է դատական համակարգի անկախությանը և դատավորների նշանակմանը։
Վարչապետը պարզաբանել է, որ իշխանությունը նպատակ ունի իրականացնել բարեվարքության խորը ստուգում և բացառել «մաֆիոզ կապերով» որոշումներ կայացնելը: Փաշինյանի խոսքով՝ դատական համակարգը անկախ է Կառավարությունից և Ազգային ժողովից, սակայն խնդիրը ժողովրդի հետ օրգանական կապի բացակայությունն է:
«Ես դատավորի թեկնածու չեմ ունեցել, և հենց դատական համակարգի անկախությունը, անկախության տրամաբանությունը հարգելով է, որ դա տեղի է ունեցել։ Ես ինչո՞ւ եմ ասում՝ դատական համակարգը կաստայացված է, այսինքն՝ կաստայացված ինքն իրեն անընդհատ վերարտադրում է, և ինչքան վերարտադրում է, այնքան դատական համակարգի կապը իշխանության հիմնական աղբյուրի՝ ժողովրդի հետ կտրվում է»,-ասել է նա:
Փաշինյանն ընդգծել է, որ դատական համակարգի և ժողովրդի միջև առկա խնդիրը լուծելու համար Հայաստանին առաջին հերթին անհրաժեշտ է նոր Սահմանադրության ընդունում: