Հարգելի շիրակցիներ, եթե ունեք կասկածներ էլեկտրաէներգիայի ենթադրյալ հավելագրումների վերաբերյալ, ապա կարող եք դիմում ներկայացնել ՀԷՑ ՓԲԸ «Ղարս» մասնաճյուղ: Այս մասին ֆեյսբուքյան իր էջում գրել է ՀԷՑ-ի Շիրակի մասնաճյուղի տնօրեն Սարիկ Մինասյանը։
«Դիմումը ստանալուն պես համապատասխան աշխատակիցները կիրականացնեն ստուգումներ և արդյունքների մասին կտեղեկացնեն:
Նշեմ նաև, որ մինչ օրս ունեցել ենք 7 դիմում-բողոք, որոնցից 1-ի դեպքում կատարվել է հաշվիչի փոխարինում (ուղարկվել է համապատասխան ստուգաչափման), մյուս 6 դիմումատուներն ընդունել են սպառած էլեկտրաէներգիայի ցուցմունքների համապատասխանությունը։
Նշված դեպքերը հիմնականում կապված են ցուրտ եղանակի և տոների կապակցությամբ սովորականից ավելի մեծ սպառման հետ։ Բնականաբար հնարավոր են նաև տեխնիկական խնդիրներ և հաշվիչների անսարքություններ։
Բոլոր նմանատիպ բողոք-դիմումներն ուսումնասիրվում են անձամբ իմ խիստ վերահսկողությամբ։
Սիրելի քաղաքացիներ, նմանատիպ դեպքում կարող եք գրել նաև իմ ֆեյսբուքյան էջին:
Նույնիսկ 1 կՎտ հավելագրման դեպքում, պատասխանատու աշխատակիցները կպատժվեն օրենքի ամբողջ խստությամբ»,-նշել է նա։