Փարիզում այս հանգստյան օրերին արգելվել է փողոցում գնված ալկոհոլի օգտագործումը՝ շտապօգնության ծառայությունների և հիվանդանոցների գերծանրաբեռնվածությունը նվազեցնելու նպատակով։ Այս մասին գրում է The Guardian-ը։
Փարիզի ոստիկանապետ Պատրիս Ֆորը BFM TV-ին ասել է, որ ուժեղ շոգի պայմաններում ալկոհոլ օգտագործելը կարող է լուրջ հետևանքներ ունենալ։
«Ինչպես գիտեք, արևի տակ ալկոհոլ օգտագործելը կարող է ծանր ազդեցություն ունենալ»,– ասել է նա։
Ոստիկանապետի խոսքով՝ շտապօգնության ծառայություններն աշխատում են ամբողջ հզորությամբ, քանի որ աճել է շոգի հետևանքով առաջացած ծանր առողջական խնդիրների թիվը։
«Մենք հասնում ենք հիվանդանոցային հաստատությունների հագեցվածության կետին»,– ասել է Ֆորը։
Փողոցում ալկոհոլ օգտագործելու արգելքն ուժի մեջ է մտնում ուրբաթ կեսօրից՝ Ֆրանսիա-Նորվեգիա ֆուտբոլային խաղից առաջ։ Այս շաբաթ Փարիզում լուրջ խնդիր են դարձել ջրազրկումը, սրտի կանգի դեպքերը և շոգով պայմանավորված այլ հիվանդությունները, քանի որ ջերմաստիճանը ռեկորդներ է գրանցում ինչպես ցերեկը, այնպես էլ գիշերը։
Արգելքը նպատակ ունի կանխել խանութներից գարեջուր, գինի կամ թունդ ալկոհոլային խմիչքներ գնելու և դրանք փողոցում, ջրանցքների կամ Սենի ափերին օգտագործելու դեպքերը։
Այն կգործի ուրբաթ՝ ժամը 12:00-ից մինչև շաբաթ առավոտյան 07:00-ն, ապա կրկին ուժի մեջ կմտնի շաբաթ՝ ժամը 12:00-ից մինչև կիրակի առավոտյան 07:00-ն։ Խանութներում և սուպերմարկետներում դուրս տանելու համար ալկոհոլի վաճառքը կարգելվի ուրբաթ ժամը 18:00-ից մինչև շաբաթ առավոտ, ապա նույն ժամային ռեժիմով՝ նաև շաբաթ օրը։
Ռեստորանները, բարերն ու սրճարանները, որոնք ունեն հանրային նստատեղեր, չեն ներառվում արգելքի մեջ, և դրանց հաճախորդները կկարողանան ալկոհոլ օգտագործել տեղում։
«Ես պետք է ապահովեմ, որ ճնշումը նվազի»,– ասել է Ֆորը՝ խոսելով հիվանդանոցային ծառայությունների ծանրաբեռնվածության մասին։