Մոսկվան բաց Է ԱՄՆ-ի հետ անկեղծ եւ փոխհարգալից երկխոսության համար, կապուղիները պահպանվում են նույնիսկ ներկայիս պայմաններում: Այդ մասին հայտարարել Է ՌԴ ԱԳՆ-ի Հյուսիսային Ամերիկայի դեպարտամենտի փոխտնօրեն Սերգեյ Կոշելյովը:
Նա հիշեցրել Է, որ Ուկրաինայի շուրջ տեղի ունեցողը մեծապես դարձել Է այն բանի հետեւանք, որ «ԱՄՆ-ը եւ ՆԱՏՕ-ն մերժել են մեր մտահոգությունները, անվտանգության իրավաբանորեն պարտավորեցնող երաշխիքներ տրամադրելու պահանջները»: Այսօր, հավելել Է դիվանագետը, ԱՄՆ-ի վարչակազմի հետ փոխգործակցության հիմնական ուղղությունների շուրջ երկխոսություն գոյություն չունի: «Մեր կողմից կարող եմ ընդգծել, որ մենք բաց ենք անկեղծ եւ փոխհարգալից երկխոսության համար այն աստիճան, ինչ աստիճան որ դրան պատրաստ Է ԱՄՆ-ը»,-հայտարարել Է Կոշելյովը՝ հանդես գալով ԱԳՆ-ի Դիվանագիտական ակադեմիայի կողմից կազմակերպված կլոր սեղանի շրջանակներում, որն անցկացվել Է «Ճգնաժամը ռուս-ամերիկյան հարաբերություններում» թեմայով:
«ԱԳՆ-ում մենք կարծում ենք, որ ցանկացած հակամարտային իրադրություն ավարտվում Է բանակցություններով: Մեր քաղաքականությունն առաջ տանելու համար ներգործության այլ գործիքակազմ, բացի բանակցությունների սեղանի շուրջ մեր դիրքորոշումները պաշտպանելուց եւ իրավաբանորեն պարտավորեցնող փաստաթղթեր մշակելուց, մենք չունենք: Հանգուցային գործիքակազմը կապուղիներն են ՌԴ-ի եւ ԱՄՆ-ի միջեւ: Ցանկանում եմ ձեզ հավաստել, որ նմանօրինակ կապուղիներ գոյություն ունեն արտաքին քաղաքական գերատեսչությունների գծով»,-ընդգծել Է դիվանագետը:
Նա հիշեցրել Է, որ Մոսկվան եւ Վաշինգտոնն արդեն շփումների պատմական փորձ ունեն առճակատման պայմաններում, որն աշխատել Է սառը պատերազմի տարիներին:
«Մենք սկսել ենք տարբեր սոցիալ-քաղաքական համակարգեր ունեցող պետությունների խաղաղ գոյակցության սկզբունքներից»,-հավելել Է Կոշելյովը: «Մենք պահպանում ենք այն բանի հույսը, որ նորմալ հարաբերություններին վերադարձը կկայանա: Անշուշտ, նման աշխատանքը պահանջում Է շարժում՝ երկու կողմից, բացառապես փոխադարձ հարգանքի եւ շահերի պահպանման սկզբունքների վրա… Ինչ Էլ որ տեղի ունենա, Ռուսաստանը եւ ԱՄՆ-ը ՄԱԿ-ի Անվտանգության խորհրդի մշտական անդամներ են, որոնց վրա Է դրված միջազգային խաղաղությանն ու անվտանգությանը զորակցելու հատուկ պատասխանատվությունը»,-ամփոփել Է դեպարտամենտի փոխղեկավարը, հաղորդել Է ՌԻԱ Նովոստին:
