ՀՀ վարչապետ Նիկոլ Փաշինյանը, Կառավարության նիստի ընթացքում խոսելով կրթության ոլորտում իրականացվող բարեփոխումների մասին, անդրադարձավ ուսուցիչների և դաստիարակների աշխատավարձերը բարձրացնելու անհրաժեշտությանը:
«Մենք չենք կարող հանդուրժել մեր ուսուցիչներին և դաստիարակներին վճարվող ծիծաղելի աշխատավարձերը և դրանք ընդհուպ եռապատկելու գործընթաց ենք մեկնարկել այն ընկալմամբ, որ այդ գործընթացը պիտի զուգակցվի ուսուցչի կամավոր ատեստավորմամբ: Ընդ որում՝ դա պետք է լինի շարունակական գործընթաց, և ատեստավորված ուսուցիչները 5 տարին մեկ նույն եղանակով իրենց աշխատավարձը կրկին բարձրացնելու հնարավորություն պիտի ստանան: Այսինքն՝ ամեն 5 տարին մեկ կամավոր ատեստավորում անցած ուսուցիչները նորից կարող են կամավոր ատեստավորվել և կրկին աշխատավարձի բարձրացում ունենալ:
Իսկ մի քանի տարի կամավոր ատեստավորում չանցած ուսուցիչներն այդ կարգավիճակը պահպանելու հնարավորություն չեն ունենալու, այսինքն՝ ուսուցիչ աշխատելու հնարավորություն չեն ունենալու»,- ասաց նա:
Վարչապետի խոսքով՝ նույն գործընթացը պետք է ընդգրկի նաև մանկապարտեզների դաստիարակներին:
