ՀՀ ԱԺ արտաքին հարաբերությունների մշտական հանձնաժողովի նախագահ Էդուարդ Աղաջանյանը սեպտեմբերի 13-ին հանդիպել է Ուկրաինայի խորհրդարանի պատգամավորներ Արտյոմ Դմիտրուկի և Դարյա Վոլոդինայի հետ:
Հանդիպմանը ներկա էին ԱԺ «Քաղաքացիական պայմանագիր» խմբակցության քարտուղար Նազելի Բաղդասարյանը և պատգամավոր Հրաչյա Հակոբյանը:
Ողջունելով հյուրերի այցը մեր երկիր՝ Էդուարդ Աղաջանյանն ընդգծել է հայ-ուկրաինական բարեկամական հարաբերությունների կարևորությունը` անհրաժեշտ համարելով միջխորհրդարանական հարաբերությունների հետագա զարգացումը և խորացումը, երկկողմ շփումները:
Հանձնաժողովի նախագահը վստահություն է հայտնել, որ հայ-ուկրաինական բարեկամական խմբի վերջնական ձևավորումից հետո երկու խորհրդարանների շփումներն ու փոխգործակցությունն առավել կխորանան և կամրապնդվեն:
Անդրադարձ է կատարվել երկկողմ առևտրատնտեսական կապերի սերտացման հեռանկարներին: Այս համատեքստում հանձնաժողովի նախագահը կարծիք է հայտնել, որ ոլորտում կա չօգտագործված մեծ ներուժ և անհրաժեշտ է համարել հայ-ուկրաինական միջկառավարական հանձնաժողովի աշխատանքների ակտիվացումը:
Երկու երկրների հարաբերությունների զարգացման գործում զրուցակիցները բարձր են գնահատել Ուկրաինայում հայերի միության և հայ համայնքի դերակատարությունը:
Համատեղ համագործակցության օրակարգի առաջմղման հարցում կարևոր է համարվել կոնկրետ գործնական քայլերի իրականացումը:
